SHËNIM: “Gjallë a dekun” n`modernitet!

Mediat njoftuan për një aksident që, kreut të BDI-së në Maqedoni Ali Ahmeti, i ndodhi teksa po shkonte të takonte kryeparlamentarin Meta, i cili nga ana e tij po zhvillonte një vizitë zyrtare në vendin fqinj. Në emër të humanes, na takon t`i përcjellim “shyqyret” për këtë fat që pati, e padyshim, urimet për një shërim të shpejtë; ndonëse kur është fjala për politikanë, e sidomos shqiptarë, patjetër që duhet të ketë patur dhe ndonjë “urim” me kumt të kundërt, nga populli a rivalët për pushtet, post apo karrige.

Ajo që ia vlente më tepër për pak trajtim, është motivi i udhëtimit të tij, në të cilin pësoi aksident: takim me Ilir Metën! Si një popull me me indicie të fortë folklorike në çdo aspekt, ka dhe në këtë rast diç që mund t`i vishet një kostum me ngjyresa e detaje folklorike. Ja, Ahmeti jo thjesht po udhëtonte drejt Metës për një takim zyrtar, por ai po rendte, si në një kalërim me galop, për t`u bashkuar me gjysmën tjetër, porsi një gjysëm e ndarë në mes nga një fat i zi; një fat që më pas, u nxirros sërish nga një mjergullnajë në muzgun e një dite, që e ndërpreu atë galop të fuqishëm mbi kalin e ëndrrës atdhetare për një dorështrëngim, çmallje e fjalosje atdhetare.

Dhe, referuar një skene tek ‘Nëntori i dytë’, ku ai trimi i plagosur i përcjell Shpend Dragobisë amanetin e Isë Boletinit për Ismail Beun se, me 28 nëntor, “gjallë a dekë do jetë n`Vlonë”, kështu dhe Ali Ahmeti, rendi fuqishëm, pa pyetur për mjergull a furtunë, që gjallë e dekë, me e taku Ilir Metën – gjallë po e po, por dhe dekun, nëse “ëngjëlli mortor” do ish “mandatuar” për ta marrë e mbështjellë në krahët e tij në fluturimin e pakthim drejt qiejve!/E.H