SHËNIM: Grida Duma më s`fundi në PD, ku është “lajmi” në këtë rast?

Në edicionin e lajmeve në Top Channel, fakti se Grida Duma dilte për herë të parë në një konferencë shtypi nga selia e PD-së, duke marrë postin e koordinatores me median në këtë parti, nuk ishte kaluar pa u bërë ‘lajm’ më vete, i veçuar nga përmbajtja e tekstit që lexoi në daljen e saj të parë si transmetuese e qëndrimeve politike të selisë blu. Dhe lajmi ishte pikërisht fakti se me detyrën e re, po startonte dhe një karrierë partiake e saj, ku ka shfaqur pa rezervë ambicjet për të qenë në majat e PD-së. Por ka dhe një lajm tjetër: fakti se asgjë në tekstin e lexuar nga znj. Duma nuk reflektonte ndryshimin e nevojshëm që duan njerëzit nga kjo parti e kjo opozitë. Profesoresha simpatike duhet ta kuptojë se nëse përfshirja e saj aty, nuk jep asnjë lloj efekti në gjuhën opozitare, nuk largon nga ajo gjuhë banalitetin, trashësinë, abuzivitetin me njerëzit duke nënvlerësuar inteligjencën e tyre; nuk sjell në gjuhën e saj moralin e munguar, vetëkritikën, raportin e sinqertë me gjindjen; nuk shpalos një vizion të ndryshuar nga ai mentalitet i kalbët që e karakterizon, atëherë le të presë pak se nuk është koha e saj. Dhe kjo këshillë ka vlerë nëse vërtet ajo ka një respekt dhe vlerësim për veten, shoqëruar nga një dëshirë e mirë dhe e sinqertë për të ndryshuar diç në atë forcë politike, në funksion të ndryshimit të realitetit shqiptar. Përndryshe, o ajo përballë publikut o Flamur Noka. Ndryshe nuk ka kuptim prania e saj në PD, kinse si kapacitet intelektual e frymë e re. Dje, iu prezantuan publikut që të dy, duke lexuar po ato tekste naive e pa pikë yndyre për një produkt normal të ligjërimit politik, një gjellë që po bëhet çdo ditë e më e pangrënshme.

Ja si do mund të kish qenë një tekst ndryshe i znj. Guma dje në konferencën e saj të parë për shtyp, nëse do kishte vullnetin të lëshonte sinjalet e para se me ardhjen e saj, do ndryshojnë qasjet provinciale e të mërzitshme të konsumit politik të PD-së:  “Partia Demokratike e sheh me shqetësim valën e shkarkim-emërimeve në administratën shtetërore e kudo. Në fokus të këtij shqetësimi, janë ata qindra njerëz që ikin e zëvëndësohen militantisht nga puna, pa përfillur asnjë kriter profesional. Partia Demokratike nuk kërkon të mbahen njerëzit e saj në punë, por të mbahen të aftët e të pakorruptuarit, nga çdo kahje politike qofshin ato. Partia Demokratike shqetësohet dhe për faktin se një largim i pamotivuar i dikujt nga puna, mund të çojë në ngjarje të hidhura si ajo e një gruaje në Korçë, që është vetëhelmuar pasi ka humbur vendin e punës. I bëjmë thirrje qeverisë (në daç dhe dyshes Rama – Meta, pa problem), që të merr në konsideratë sa anën profesionale e sa atë njerëzore, kur është fjala për të larguar dikë e për të emëruar dikë tjetër në një punë”.   Nëse znj. Duma nuk arrin të përcjellë një tekst të tillë në emër të forcës politike që përfaqëson, më mirë mos i përzihet Nokës në këtë punë, apo qoftë dhe Bylykbashit!       /  E.H.