SHËNIM: Ja si Berisha bën Ramën fitues e veten humbës!

Krahas sulmeve klasike verbale, PD-ja – ajo që përcjell frymën e Berishës, sigurisht – po riinvestohet fuqishëm në goditjen ndaj Ramës, me në fokus aspekte morale të veçanta, gjithnjë duke menduar se kështu do përfitojnë nga ndjeshmëria e opinionit, kur t`i ngacmohen gjendrat e kësaj ndjeshmërie me lajme që kanë të bëjnë me gjuhën e kryeministrit. Dhe nuk është si në rastin e Berishës, ku një lapërdhari orale e tij në ligjërimin politik, dëgjohet prej çdo veshi; në rastin e Ramës, ato nuk dëgjohen publikisht, por serviren prej shtypit të demokratikasve, si diçka e zbuluar prej tyre. Kjo konfirmon faktin se në PD, ende nuk mendohet për një stil tjetër të Public Relations, se askush nuk bën llogari se çfarë ka rezultuar e dështuar deri më tani e se çfarë duhet të ndryshojë në funksion të treguesve të sukseshëm. Gjithçka është në diktatin e Berishës, të përbërë nga një instikt i verbër plot nervozitet e pa asnjë ftohtësi mendimi.

Një ndër dështimet më të mëdha të tij, ka qenë pikërisht mitralimi pa u ndalur ndaj figurës së Ramës nga çdo anë, nga çdo drejtim, pa asnjë cak moral. Dhe kjo, ka zgjatur për vite e vite, deri sa kanë ardhur në këtë pikë të sotme, ku Rama është kryeministër e Berisha një opozitar me kuotat më të ulta të reputacionit sa është në politikë.

Mësimi më i mirë për Berishën, duhet të kish qenë fotoja me Ramën cullak në lokalet e 2007, ku ajo mënyrë e ulët e goditjes së kundërshtarit, ju kthye në boomerang, duke lënë vetë brekët e dalë cullak para një rezultati katastrofik, që e çoi në humbjen e rradhës së kryeqytetit. A pra ky është ai politikani që e mbajnë për të madh kasnecët e tij?! / E.H.