SHËNIM: Ku mbeti PP-ja pas 12 qershorit?!

Partia Socialiste sot ka ditëlindjen e saj. Në një variant tjetër, në atë cinik, është riciklimi i saj me natyrë konvertuese. Fill pas ndërrimit të emrit në Kongresin e 10-të, nga Parti e Punës në Parti Socialiste, nënkryetari i atëhershëm Ismail Lleshi, njeriu që i ra për pjesë ta shpallte këtë moment në kongres, u ndesh me një pyetje jo të lehtë në një prej takimeve sqaruese me elektoratin e majtë, startuar pas kongresit. Mu në Dibrën e tij, atij iu drejtua dikush duke e pyetur me dhelpëri tipike dibrane, nëse një të dënuari me vdekje duhej t`i falej jeta pasi ndërronte emrin, një aluzion i kuptueshëm për kohën, derisa ende PD-ja dhe Berisha, me sjelljen e tyre politike, nuk e kishin bërë PP/PS-në  që të dukej si një qengj, përballës bishës që po lindte. Sakaq, ndërrimi i emrit kishte ardhur një vit pasi Edi Rama kërkonte me ngulm daljen jashtë ligjit të Partisë së Punës, një gjë kurrë e artikuluar nga Berisha dhe të tijtë; dhe që për më tepër do kostonte në figurën e Ramës për t`u quajtur nga Berisha ekstremist e anarkist, pikërisht prej kësaj lloj kërkese e ca të tjerave, që binin ndesh me frymën ramiziste të PD-së në shpërgënj. Kohët më pas e sollën që tej aspektit zyrtar e legal, të mos kuptohej qartë se kush ishte trashëgimtarja e vërtetë e PP-së, PS-ja apo PD-ja?! Gjërat komplikohen më tepër kur shoqërohen prej mistereve. PS-ja nuk përbën mister. Ka qenë PK, u bë PP dhe koha e solli që të bëhet PS, një gjë që që e dijnë të gjithë dhe që nuk e ka mohuar. Por PD-ja nga vjen, se kjo të mundon?! Po ashtu kohët e sollën që, a prej kompleksit të së shkuarës a prej pasurisë individuale në lidershipin e saj, PS-ja të pësonte sa e sa thyerje, të provokonte prurje, të tundej e të shkundej, të lahej e shplahej, të pësonte revolucione të brendshme; karshi një PD-je të dënuar për të qenë një ujë i ndenjur zakonor porsi lideri, pavarsisht emrave në ikje e ardhje. Dhe kur vjen 12 qershori, me këto nuk merret askush. Të gjithë nxitojnë tek ftesat, si ato gratë thashathemexhesha në prag dasme që zjejnë me njëra – tjetrën për të gjetur inate, zemërime apo hatëmbetje tek listat e të ftuarve. Ndërkohë, temë kryesore do ishte ajo se ku mbeti PP-ja pas 12 qershorit. Druhemi se po ju futëm kësaj analize, përfundimet nuk do jenë hiç entuziaste, pasi dhe në këtë rast do na fanitet….Berisha!   / E.H.