SHËNIM: Kur do të nisë pastrimi i i bregdetit…nga “llumi me dy këmbë” ?!

Në jetë, janë ca profesione që përçojnë dhe një ide mbi karakterin e njeriut  ushtrues, por që nuk mos përkojë ashtu siç skicohet në kokat tona. Fjala vjen, tek një këpucar e kemi të vështirë të shohim njeriun romantik; e tek një shkrimtar ose poet, as që na shkon mendja se pas tyre fshihet dhe ndonjë birbo i rëndomtë që e nxjerr vetën të tillë në situata të caktuara. Edhe tek një individ i angazhuar me biznes të lidhur direkt me turizmin, më shumë se një të etur për para, prirja është të shohim një të apasionuar për t`u dhuruar të tjerëve kënaqsi stine, pavarsisht përfitimeve monetare. Një pronar hoteli dhe restoranti buzë detit, duhet të ish i mbrujtur me ndenja mjaft të holla dhe me një karakter të butë e të ndjeshëm, për ta merituar një pozitë të tillë, që jo çdokujt i jepet rasti ta ketë. Ai duhet të jetë mjeshtër në komunikim, sajdisje, buzëqeshje, ëmbëlsi, sportivitet, kreativitet; duhet të suprizojë më të bukurën, të veçantën, befasuesen; duhet të jetë si një shenjë e ndritshme dhe e pashlyer në kujtesën e atyre që marrin shërbim nga ai, në 3, 5, 10 apo 15 ditë qëndrimi tek prona e tij. Por çfarë ndodh në Shqipëri?! Si në çdo aspekt, edhe në të ashtëquajtur turizëm, asgjë nuk është në vendin e vet; edhe aty, lumpenproletarët e dikurshëm të bërë zengjinë me mënyrat më amorale të mundshme, kanë hedhur rrënjët e tyre. Autori i vrasjes makabre dy ditë më parë në Dhërmi, – ku jo vetëm që e vrau të gjorin 19-vjeçar, por dhe e hodhi në det kufomën, aty ku të nesërmen do futeshin turma njerëzish për t`u kredhur, – ndoshta do e kish kryer atë krim dhe në rrethana të tjera, por gjithsesi, jo duke qenë pronar hoteli e restoranti, e për më tepër me emrin ‘Shija e Detit’, e ku pa, në Dhërmi. Ndërsa një ditë më pas, në Velipojë, mosmarrëveshjet për punë shezlongjesh, çojnë në përdorim arme, ku të shtënat plagosin një shtetase të huaj, ardhur nga ai vend, që nuk dihet se përse gjithnjë u shkon fati ters në veriun e Shqipërisë: Çekia.  Si duket, ta ç`kriminalizosh bregdetin, është një sfidë më e madhe sesa ta ç`betonizosh e pastrosh atë!  Ose ndryshe, ta pastrosh…nga “llumi me dy këmbë”!    / E.H.