SHËNIM: Kur PD-ja thotë: Kurrë!

Një pohim, më saktë një mohim dramatik bëri sot kryetari i Partisë Demokratike Lulzim Basha, sapo mori vesh vendimin e Gjykatës Kushtetuese kundër kërkesës së PD-së për rrëzimin e ndarjes së re territoriale. “Kurrë nuk do ta njohim këtë ndarje”, tha Basha. Ka një barcaletë të poshtër maskiliste se çfarë nënkuptojnë femrat kur thonë kurrë, kur thonë ndoshta etj. Por në rastin e PD-së, doza e rëndë e poshtërsisë rrëzohet vetiu, për shkak të vetë historisë së marrëdhënieve të kësaj partie me mohimet dhe pohimet e veta bujëmëdha.

Ishte Berisha dhe PD ata që do të refuzonin kategorikisht pjesëmarrjen në hartimin e projekt-kushtetutës së vitit 1998, duke e denoncuar këtë draft dhe përpjekjen që po bëhej, me njëqind të zezat. Po vetë Berisha nuk ngurronte më pas ta akuzonte kundërshtarin Nano në qeverisje, se po shkelte kushtetutën, se po bënte akte antikushtetuese etj. Aq më tepër pastaj, kur erdhi vetë në pushtet, që gdhihej e ngrysej me dokumentin themeltar të shtetit në gojë, me atë dokument që deklaroi se “Kurrë” nuk do të njihte.

Edhe pse e pranuan qysh në krye të herës se një ndarje e re territoriale ishte e nevojshme, PD në opozitë, më saktë Berisha me gojën e Bashës, refuzoi të merrte pjesë në debatet dhe diskutimet për reformën e territorit. Refuzoi të jepte opsionet e kundërshtimet e veta, refuzoi të plotësonte vendet bosh në komision, refuzoi si ai fëmija çokllan që e di se zhytet në gabim gjithnjë e më shumë, por aq më fort ngul këmbë në të vetën. Dhe kur e lënë vetëm e s’ja var njeri, ja plas të qarit. Për ndarjen e re, PD-në e la vetëm dhe PDIU-ja dhe aleatë të tjerë, dhe atëherë me lot në sy Basha e bëri hasha partinë e Idrizit.

Ironikisht, PD-ja po bëhet gati të hyjë në Kuvend, duke kërkuar paraprakisht plotësimin e pesë pikave (?!) njëra prej të cilave është respektimi i Kushtetutës. Asaj kushtetute që selia blu e ka bërë rreckë, e që gjykatës së asaj kushtetute nuk ja njeh vendimet. Si është e mundur që Gjykatën Kushtetuese e njeh kur kërkon të denoncosh e të ankimosh, por nuk e njeh kur vendimi është kundër teje? Për PD-në është që ç’ke me të e mundur, dhe kjo nuk është hera e parë.

Por në rastin konkret, rezulton që edhe nëse hyn në Kuvend, opozita kryesore nuk do marrë pjesë në ndryshimet e kodit zgjedhor, sepse nuk ka për të njohur “Kurrë” ndarjen territoriale. Mesa duket, me logjikë të thjeshtë as do të hyjë në zgjedhjet lokale. Por logjika e gjyshit shqupas nuk është kurrë e thjeshtë, por e mbrapshtë: Ai po e stërvit ogiçin që ka vënë në krye të partisë, që të ndihet mirë kur shkakton destabilitet, të kënaqet kur i prish punë vendit dhe padyshim, të mërzitet kur bëhet ndonjë punë e mirë. Në këtë pikë, një pyetje do ishte e udhës të merrte përgjigje nga Lulzim Basha. Meqë jemi tek Gjykata Kushtetuese, a e njeh ai rrëzimin që kjo gjykatë i bëri paktit detar me Greqinë, të firmosur nga Basha? Se me rregull treshi, për Lulin ky pakt nuk është rrëzuar Kurrë!