SHËNIM: Kush është “Tan Lame” i PD-së?

Një numër banorësh të Durrësit kanë protestuar kundër heqjes së shatërvanit në sheshin qëndror, aty ku po zbatohet një projekt rikonstruksioni, për t`i dhënë sheshit një pamje krejt tjetër.

Ky do ishte lajmi më i mirë (ndonëse tejet i çuditshëm) i viteve të fundit, që ka në qendër qytetarin shqiptar: I mirë për shkak të zgjimit të vetëdijes qytetare ndaj çështjeve urbane, por dhe i çuditshëm për shkak të kohës së vonë të zgjimit – si të thuash, mbas të vjelash – tashmë që qytetet tona dhe jeta jonë urbane, ka pësuar një shpërfytyrim katastrofik; lajmi i mirë, sikur protestën mos ta kish thirrur dega lokale e PD-së, e ata dhjetra banorë, mos t`i kish nxjerrë në shesh një nerv politik, por krejtësisht shoqëror.

PD-ja mund të jetë dalluar për shumë gjëra, qoftë dhe për keq, por që të ketë lënë ndonjë gjurmë për mirë në mjedis e në produkte urbane, këtë vështirë ta thuash.

Vini re: nuk ka ende në rradhët e saj një zë, që të përfaqësojë edhe profesionalisht, sfidat urbane e ndjeshmëritë ambjentale. Vetëm nëse ecet më parimin “bëje mirë, bëje vetë!”, nuk është çudi që të shohim Ristanin një ditë dhe në rolin e “Tan Lames”!/E.Hoxha