SHËNIM: Kush ju pëlqen më tepër, zëri i Berishës apo i Lad Grillos?!

E vetmja shpresë që e gjithë kjo situatë tensioni politik që ka për “babë” bacën Salë të fashitet e zbehet, është afrimi ditë pas dite i Botërorit ‘Brazil 2014’ . Afërmendsh që e gjithë vëmendja do përvijohet në fushat e blerta të vendit të largët, pa u marrë shumë më atë që ndodh në parlament, ku jo luhet, por gjuhet me topin e gjuhës së shfrenuar, si dhe me atë që ndodh anash godinës qeveritare, si një zgjatim i luftës politike dërdimene e psikopatike të opozitës. Që do të thotë pra, se zëri i cjerrë Berishës, kjo kolonë zanore e trishtë e jetëve tona në 23 vjet, pa asnjë lloj këndshmërie vokale, do zëvëndësohet ndoshta nga një ndër zërat më simpatikë të komenteve futbollistike: ai i Vladimir Grillos. Çdo gjë ka ndryshuar në Shqipëri, veç mënyrës së qetë se si Lad Grillo komenton. Kur dëgjon atë, të duket se koha ka ngecur në vend. Eshtë ndoshta ndër të rrallat relike simpatike që trashëgohet nga komunizmi,  pa patur sigurisht asnjë lidhje me atë sistem, përveçse me sportin. Dhe po ta vëresh me vëmendje, kur komenton Lad Grillo, jeta e gjithësecilit duket se kalon revistë me të gjitha detajet, pasi timbri i tij i paqtë është njesuar me ndjesitë e jetës së shumëkujt që ka jetuar në atë kohë. Personalisht, vijoj t`i dëgjoj komentet e tij me kënaqsi. Eshtë e vetmja gjë normale që ka ky vend.  Dhe nuk do e teproja po të thosha se është “monument” i pa zhvlerësuar nga furtunat dhe prurjet e kohës. Edhe pak ditë dhe zërin e tij do e kemi sërish në ambjentet tona familjare e publike, së bashku me emocionet që dhuron futbolli. Do vijë fill pas atij trullosësit të Berishës. Dhe do mendojmë që shyqyr që bota e jeta është kaq e madhe dhe e gjerë, sa të  mos jetë e gjitha fytyra, zëri dhe fjalët e tij!    / E.H.