Leksion nga Kosova, dhe jo vetëm për Rrugën e Kombit

Eshtë një leksion për ne, shtetin tonë, pjesa kosovare e Rrugës së Kombit; jo vetëm për cilësinë ndryshe, për sinjalistikën e plotë dhe për mirëmbajtjen model (nuk sheh të ketë shqyer ndokush llamarinat ndarëse në mes dhe ato mbrojtëse anash), por dhe për faktin se përgjatë gjithë gjatësisë së saj, nga dogana e Morinit e deri në zonat periferike të Prishtinës, nuk sheh asnjë ngrehinë në ndërtim e sipër për lokal apo karburant, ose më e pakta ndonjë platformë a vend të gërmuar gati për të hedhur themelet e ndonjë biznesi. Thjesht bie era shtet dhe në këtë pikë.

Ndërsa tek ne, sapo nis të ndërtohet një rrugë, traseja  në një stad kantieri shoqërohet dhe me akte të tokës së xanun anës saj, ku të shkathët që nuk pyesin as për shtet e as për ligj, nisin të vënë në zbatim idetë e biznesit, ose me karburant ose me restorante. Madje ndodh të projektojnë dhe shtëpi aty buzë rrugës, pse jo, katin e dytë të restorantit. Eshtë paradoksale se si në Kosovë ekziston një veneracion për shqiptarët e Shqipërisë në drejtim të nivelit arsimor, ndërkohë që kur vjen puna për të respektuar ligjin dhe shtetin në disa drejtime të caktuara, kjo diferencë është e hatashme mes dy shoqërive, ku ne, shqiptarët e Shqipërisë, jo të mirëarsimuar, por ngjajmë primitivë karshi bashkëtardhetarëve tanë të Kosovës.

Argument tjetër për këtë, është dhe zbatimi me rigorozitet perëndimor i ligjit për moskonsumin e duhanit në lokale e ambjentet publike. Ka një të mirë në këtë mes kur sheh se ka shqiptarë të udhëhequr prej shqiptarësh që kanë ndjeshmërinë e duhur ndaj ligjin dhe vullnetin e duhur për ta zbatuar atë; por ka dhe një të keqe, që është paaftësia jonë dhe vullneti ynë i mangët për të mos e ndjekur këtë shembull të mirë të tyre.