SHËNIM: Pas një debati televiziv mbi sfidat e ekonomisë

Arben Malaj nuk është nga ata, prej të cilëve priten gjenialite në politikë; por dallohet për faktin se tek ai, nervi politik asnjëherë nuk e ka kaluar masën deri në atë pikë sa t`ja njollosë staturën  e një eksperti në çështjet e financave,ndryshe nga një sivëlla i tij i djathtë, Florion Mima, që tej ekspertit, çuditërisht bën nganjëherë dhe “Ben Ristanin” në një version të pagëlltitshëm.

Si, qysh e tek, pak rëndësi ka, por Malaj e Islami, dy figura të njohura të PS-së, nuk janë më sot në skakierën udhëheqëse të kësaj partie. Por që të dy bëjnë një diferencë të thellë në mënyrën se si kanë zgjedhur ta ruajnë dinjitetin dhe vlerën në hapësirat mendimit politik e tij publik në përgjithësi.

Edhe pse mund të këtë arsye për t`ju kthyer vënçe Ramës, Malaj po i qëndron besnik statusit të tij politik si i majtë; dhe qëndrimet e tij nuk po i kushtëzon me telashet e tij brendapartiake. U duk qartë kjo në një debat në Top Show, ku u diskutua mbi sfidat e ekonomisë në 2014.

Nga ana tjetër është Kastriot Islami, që ende nuk dihet se për çfarë konkretisht u hatërmbet më Ramën, duke vijuar me një sjellje politike të atillë që, edhe pse i interesonte PD-së, për vetë llojin e luftës politike, prapseprap ua pështiroste, siç ua pështiros dhe sot një pjese, prezenca e tij mes tyre. Ndërrimi i “seksit” politik me lehtësinë e një leshkoje, shoqëruar me një ngrefosje e mani madhështie, e ka kthyer tashmë në një figurë, të vlefshme vetëm për lajme të showbiz-i politik. E.H.