SHËNIM: Mbi këshillat për Ramazan në faqen web të Ministrisë së Shëndetësisë

Edhe pse nga shumëkush është parë si zgjidhje afër të përsosurës, laicizmi kurrë nuk ka mundur të jetë paqtues mes shtetit pretendimeve të religjiozes. Kjo e dyta, e përfaqsuar në shoqëri nga institucioni zyrtar dhe jo zyrtar i besimit, ka parë tek formula e laicitetit, një kamuflim dhelpërak të antireligjiozes së pastër, duke u kacafytur herëpasherë, sidomos në lëmën e ndjeshme të të drejtave njerëzore, proklamuar me të madhe pikërisht nga kredot e sistemeve laike.

Por së fundi, vjen një preçedent shqiptar që ja vlen të merret në konsideratë si një formë e përkujdesjes së laikes për religjiozen, bazuar pikërisht tek detyrimet e së parës si domen shtetëror ndaj shtetasve të vet, edhe kur ata i përkasin pastërtisht, thelbësisht dhe praktikisht një besimi të caktuar. Në faqen web të Ministrisë së Shëndetësisë, has këto ditë një hapësirë kushtuar këshillave për agjëruesit e Muajit të Ramazanit. Këshillat janë të llojit dietik në funksion të shëndetit, pa asnjë lloj interpretimi religjioz.

E pa paragjykuar, paketa e këshillave përfaqson një shërbim të caktuar që shteti u bën shtetasve të vet, si detyrim e respekt ndaj tyre, pa e cënuar aspak pozicionin e vet laik, por përkundrazi në sintoni me kredon e saj si shërbëtor i shtetasve pavarsisht bindjeve të tyre fetare e jofetare, në barazlargësi me çdo të tillë që përfaqsohet nga segmente të ndryshme shoqërore. Pra, në debatin e madh e të acartë global që vijon prej dhjetra vitesh mbi atë se çfarë përfaqson në të vërtetë laikja dhe se si duhet të sillet ajo përballë religjiozes, ia beh sakaq dhe Ilir Beqja nga Shqipëria, i cili ofron një model paqtues, si për të përligjur statusin e një rilindasi… edhe në këtë pikë.

A.N.