SHËNIM: “Ne pra, jemi një popull që vjedhim veten (!)…”

Titulli i mësipërm është një frazë e shkëputur nga një shkrim i Fatos Baxhakut, ku trajton paradoksin e klasifikimit si ‘lajm të madh’ e ‘lajm të vogël’ në mediat tona, ku më së shumti çfarë është e madhe trajtohen si e vogël dhe anasjelltas. Dhe si shembull merr lajmin mbi abuzimet e tmerrshme financiare në Ministrinë e Punës, që është zvogëluar tashmë në një lajm të vockël e rutinë. Dhe pse ndodh kjo? Sepse konkludon Baxhaku, ne jemi popull që vjedhim veten. Sigurisht, qasje të tilla kaq provokative e ngacmuese për ndërgjegjet tona të çoroditura, nuk i has në panelet e debateve politike, ku zakonisht flitet e nganjëherë dhe bërtitet për çdo gjë, përveç thelbit. Dhe ky është një thelb i frikshëm. Ne jemi sot këtu, sepse hajdutëria jonë shumëformëshe, herë e rëndomtë dhe herë e sofistikuar ka fituar status normal, ngase ne vjedhim veten. Ne nuk jemi në atë lloj situate ku ka hajdutë në një anë e të ndershëm në anën tjetër, e këto janë dy kampe në luftë me njëra – tjetrën. Nëse do ishte kështu, nuk do ishte dhe aq tragjike, pasi kjo luftë ka ekzistuar në çdo kohë e çdo vend; tragjike është se edhe padashjen tonë, ne jemi përfshirë në vjedhje. Dikush ka vjedhur prona, por ka vjedhur dhe ai që ka marrë një diplomë false, ndonëse nuk pranon të quhet hajdut, paçka se me atë diplomë “vjedh” më pas ndonjë vend pune; vidhet sot e gjithë ditën energjia, pa dallim mes shtresash e rangjesh shoqërore, por vidhet dhe duke iu shmangur detyrimeve ndaj shtetit në taksa. Pra, në qerthullojmë në një proces vjedhjeve, ku njëherësh jemi dhe hajdutë por dhe viktima, e theksoj, edhe pa dashjen tonë, ose të asaj kategorie më saktë që nuk ka pranuar e nuk pranon ta ndyjë veten me futjen e duarve në pasurinë e tjetrit. Sipas asaj që aludon Baxhaku në shkrimin e tij, nëse do ishte ndryshe, lajmi mbi zgrapjen e fondeve dhe abuzimin me to në Ministrinë e Punës, por dhe ato mbi vjedhjen dhe hajdutllëkun si fenomen, duhet të ishin shumë të mëdha dhe shokuese madje. Para se të diskutojmë mbi atë nëse jemi apo jo europianë; nëse duhet apo jo në jepet statusi; nëse duhet apo jo t`i bashkohemi BE-së, ne duhet ta nisim me veten një reformë, pa dyshim, të padëgjuar më parë: t`i largohemi vjedhjes! Pasi nuk është se vjedhim dikë e përfitojmë diçka. Në fund, shumatorja e vjedhjes, na tregon se veten kemi vjedhur, gjithsesi!