SHËNIM: Një denoncim fisnik, nga Fisnik Ismaili

Fisnik Ismaili, autor i obeliskut unik Newborn në Prishtinë, ka aplikuar një variant mjaft fin, plot fantazi e art, për të denoncuar një prej lapërdharive më të fundit gazetareske: publikimin, kinse të dy bisedave private në wiber mes kryeministrit dhe një ministri, respektivisht me dy femra, personazhe të njohura, njëra në politikë e tjetra në showbiz. Ismaili ka publikuar një bisedë të sajuar mes tij dhe Kim Kardashian, tipike si ato që iu servirën publikut shqiptar ditë më parë si scoop-e tronditëse. Nuk duhet shumë inteligjencë për ta nuhatur trukun në to, por patjetër që duhet të kesh shumë ndjeshmëri morale për t`i urryer. Në kushte shqiptare, një shef qeverie dhe një ministër, edhe nëse punojmë mirë, ose të paktën kanë prirjen minimale të punojnë mirë, kanë njëherësh dhe koston e rëndë për t`u ndeshur me kritika të të gjitha llojeve, të drejta apo të padrejta qofshin, por që sigurisht, nuk janë të imunizuar nga gabime apo gafa, për të cilat e meritojnë t`i fshikullosh vendçe. Dhe rastet kur nuk mungojnë, pa qenë nevoja për t`u futur në sinore intimitetesh, aq më tepër kur bëjnë muuuu që janë sajime bajate. Në vitet e para të qeverisjes së Erdoganit në Turqi, një media opozitare siguroi një material video me të dhëna kompromentuese nga jeta private e liderit të opozitës. Por ajo video kurrë nuk u transmetua, pikërisht nga reagimi i ashpër i shefit të qeverisë turke, sipas së cilit, debati politik, garimi me vizione politike, mjafton si betejë; duke themeluar me këtë preçedent dhe një moral të ri politik, lidhur me gjuhën, stilin dhe etikën. Jo vetëm për aspekte delikate që kanë të bëjnë me moralin, ç`ka mund të çojë deri në shkatërrimin e një familjeje, por dhe disa akuza me substrat patriotik, ku aludohet për këtë apo atë politikan si agjent të këtij atij apo atij shteti armik, janë teprime të panevojshme, derisa janë në nivel aludimi. Çdo pushtetar i këtij vendi, është i krejt i mjaftueshëm në punën dhe rolin e tij, për t`u shpallur i aftë ose i paaftë, i drejtë ose jo i drejtë, burrë i mirë ose jo i mirë, i dobishëm ose jo i dobishëm për vendin, pa qenë hiç nevoja për foto, video, apo biseda në wiber. Shqipëria, është tipik një fshat që nuk do kallauz në dukshmërinë e vet të qartë, si pasqyra më adapte që tregon se nga ç`skotë është udhëhequr.  / E.H.