SHËNIM: Për çfarë duhen këshilltarët?!

Qarkorja dërguar disa ambasadorëve nga këshilltari diplomatik i Presidentit Nishani me një adresë private e-maili, përbën një metaforë të trishtë në disa drejtime. Këshilltari Besnik Konçi është një emër i njohur i diplomacisë dhe përbën habi një diletantizëm i tillë. Por së këndejmi, a nuk përbën habi fakti se gjithë kjo Shqipëri me punë të mbrapshta në çdo drejtim, është si pasojë e profesionistëve?! Ne sot e kemi të vështirë që të marrim një fushë të caktuar, një sektor, ku punët të kenë ecur mbroth. Ndërkohë që në krye të tyre, sidoqë të ketë qenë puna, ka patur dhe profesionistë. Por mesa duket, tek ne tjetër është të jesh i aftë e profesionist e tjetër i përgjegjshëm e me moralin e duhur në atë që bën. Sepse ndryshe nuk ka si shpjegohet akti i këshilltarit të Nishanit. Dhe vijmë të këshilltarët. Me dyzina kanë qenë e janë ata në stafet e krerëve të lartë të shtetit, por deri më sot, ne nuk kemi një ‘histori karriere’ prej këshilltari të filan Kryeministri apo Presidenti, për shkak të të cilit, njëri apo tjetri të jenë ndikuar fuqishëm e të kenë bërë revolucion në performancën e përgjithshme politike. Pothuajse të gjithë, me këshilltarë apo pa këshilltarë, janë sjellë politikisht po ata që kanë qenë si brum i përgjithshëm. Mjaft të shihet performanca e Presidentit Nishani. Me njerëz apo pa njerëz të mençur pranë, ai nuk mund të prodhojë diçka tej vetes në atë përmasë që është njohur ç`prej kurrë i është përmendur emri në politikë, që e rendit në mos tek të rëndomtët, tek të zakonshmit pa asnjë lloj befasie për mirë. Por precedent i fundit i ardhur nga Presidenca, ishte akoma dhe më i rëndë: Këshilltari vetë është bërë për t`u këshilluar! Pa le pastaj Presidenti!       / E.H.