SHENIM: Për kë po bën tifo Berisha?!

Nëse i referohemi një aktualiteti të caktuar, siç është Botërori i futbollit, pyetja që shtrohet, natyrshëm që  lidhet me preferencat në fushën e lojës. Por po aq, kjo pyetje zhvendoset dhe në një realitet tjetër, më të afërt, më të prekshëm, siç është ai i Lazaratit. Edhe aty po zhvillohet një betejë, një duel, një matje forcash, ku nuk dihet se kush do triumfojë në fund, e që shprehur me gjuhën e llotos, ekziston gjithsesi një dilemë mes 1-shit, 2-shit dhe X-it, pavarsisht kuotimeve, llogaritur dhe faktin se policia luan në fushë kundërshtare. Deri më tani, dijmë se Berisha është më tepër i dhënë pas Lazaratit, të shoh se ç’po ndodh me ndeshjen e atjeshme, sesa ç’ndodh në Brazil. Po ndërsa nuk ka asnjë shans që të ndikojë për ndonjë ndryshim rezultati në ndeshjet që zhvillohen në terrenet e gjelbërta të atdheut të ‘sambas’, tek ndeshja që po zhvillohet në terrenin e ashpër të Lazaratit, ekzston një hapësirë për të bërë trajnerin për një nga ekipet në duel. Ndaj, ka shumë rëndësi të dihet se me kë është. Dhe kjo duhet t’i kërkohet me ngulm. Askujt nuk i intereson të dijë nga Berisha se me ç’skema po luajnë ekipet, se ç’11-ësh kanë hedhur në fushë, se a po luhet me hile nga ky apo ai ekip; sot, më e rëndësishme është të dihet se me kë është, për kë po bën tifo. Jo aq për shijet apo preferencat e tij, por për të ardhmen e këtij vendi. Brazili, sado magjik, nuk është asnjë grimë përcaktues në të nesërmen e të ardhmen tonë në këtë vend, në Shqipëri; ndërsa Lazarati, ndeshja e atyshme, golat që shënohen e pësohen, po. Dhe është rasti që postulatin e dikurshëm me përmbajtje socio-ideologjike “Si është rinia sot, do jetë atdheu neësr!”, ta riformulojmë si: “Fati i Lazaratit sot, është fati i Shqipërisë nesër!”

E.H