SHËNIM: Po jetimët e 21 Janarit, cila “canëri” politike i shkaktoi?!

Reagimi shoqëror e politik me tipare vullkanike kundrejt personit Agron Cane dhe gjestit të tij pedofilik në tentativë, sa është pozitiv për faktin e provokimit të një ndjeshmërie, që me shpresë, mund të ndikojë në evitimin e një të keqeje, nga ana tjetër nxjerr në pah plot paradokse, sidomos kur zhurmon politika.

Parë sociologjikisht, akti i Canes, është konsumuar brenda një terreni social përplot pedofili të natyrave jo drejtpërdrejt seksuale. Mjaft të thuhet se të përdhunuarit kryesorë në një shoqëri të sëmurë nga veset si e jona dhe në një terren social të shëmtuar, të pashëndetshëm e plot mizerabilitet, fëmijët janë viktimat kryesore; në këtë vend, ku duket se çdo gjë që gatuhet, është kundër të ardhmes së tyre.

Parë politikisht, situata është po aq e rëndë, pasi, ç`ka produktuar politika deri më sot, krejt pa vizionin e duhur të së nesërmes, për më tepër e ndyrë nga goja, e pisët dhe gërrnjare, në mos seksualisht, ka ushtruar përdhunim psikologjik mbi grupmoshën e parë të kësaj shoqërie.

A nuk janë parë gjestet politike të dyshes Berisha – Topalli dje në qeverisje si akte të pedofilizmit politik, teksa u janë drejtuar të vegjëlve nëpër shkolla me gjuhën e përdhunshme të vrazhdësisë politike?! Çfarë ka ndodhur, është një “canëri” e përmasave katastrofike politike e sociale e shtrirë në gjithë këto vite, ku provën kryesorë që është e tillë, a ka në mënyrën se si reagon Berisha, një “cane” politike, që vijon ende ta canërojë ajrin që thithim, ku në pozitën e plakushit politik, i dukemi të gjithë si ca çiliminj ku ai konsumon parreshtur epshet e tij politike.

Si dëshmi e kësaj, a nuk janë dhe jetimët e 21 Janarit?!