SHËNIM: Punë grash!!!

Në stilin e tij ligjërues me përcaktorë absolutë, më kështu, më ashtu, në Europë, në Botë, Sali Berisha prodhoi precedentin – dhe në këtë pikë do huazuar – më të pazakontë në animalizmin e tij politik, nëse e gjykojmë me gjuhë darviniane si një homosiapens: sajoi një kauzë grash, edhe me ndihmën e një grarie goxha të volitshme për të tilla beteja, që i ka pjesë të vathës së tij, sigurisht dhe me  gaditshmërinë e një të tredhuri moralisht e psiqikisht, siç është ai që ka ngarkuar të aktrojë kryetarin. Është ndër ato sajesa që fort mirë e parathonë se ç`lloj opozite do jetë  kjo, e që shuan çdo lloj shprese se PD-ja e Bashës mund të jetë diç tjetër nga ajo e Berishës. Do jetë pra një lloj opozite, pa asnjë befasi për mirë, thjesht një Berishë që e lumturon çdo gjë që e bën të vuajë kundërshtarin; e lumturon kaosi, mizerabiliteti në një shoqëri; e lumturon zhurma, parehatia, shernajat, elementët psikopatike në sjelljen sociale të njerëzve, injoranca e skajshme, problemet, streset, ankthet, çdo që e mban njeriun të ngërthyer në një gjendje drame të pandryshueshme, sepse ky në të vërtetë është moçali, ku ai jo 1 orë e ca minuta, por llokoçitet e noton sa të ketë frymë. Dhe ka 23 vjet që investon në këtë lloj moçali.      

 Çfarë ka ndodhur? Dy deputete nga listat e dy partive në qeverisje, janë tërhequr, dikush me arsye të bëra publike e dikush jo. Janë pjesë të partive të tyre, siç janë pjesë e familjeve të tyre dhe mund ta kenë arsye të shumta për një akt apo ndonjë tjetër, në këtë rast se përse janë tërhequr. Opozita thotë se në vendimmarrjet e tyre ka dorë mafia. Nuk është ndonjë gjë e re: u mësuam në 8 vjet opozitë të PD-së e do mësohemi gjithashtu, se çdo gjë tek kundërshtari është mafia. Afërmendsh, për çdo njeri me dy pare mend, tërheqjet e dy grave edhe mund të jenë për arsye jo personale e krejt partiake, që jo domosdoshmërisht kanë të bëjnë me mafian e broçkullat e Berishës. Gjë krejt normale për një parti. Nëse i dhemb graria e majtë grarisë së djathtë, kjo e dyta, mund të mjaftohet me një deklaratë sensibilizuese dhe deri këtu është sinori i çështjes. Ajo që vjen më tej, është thjesht por shumë shëmtueshëm: burrëri e grarizuar e grari e shfytyruar, në variantin më topallizues e berishizues me Bashën në mes. Nëse vijohet kështu, do kemi furtuna parlamentare, jo të sajuara në një gotë uji, por nga bulza djerse në sqetullat e Berishës. Aq duhmërëndë do jenë!