SHËNIM: Rrëfimet e “veteranëve” nuk po kanë të sosur!

Ndër dhjetra tituj të gazetave këto ditë, feks dhe ai me rrëfimet e një gruaje tropojane me seks-skandale që kanë në qendër atë vetë, e ca udhëheqës komunistë të kohës. Pa dyshim që grish, por vetëm atë masë njerëzish që nuk dallojnë dot realitetin nga telenovelat, ose që kanë zgjedhur ta jetojnë realitetin porsi telenovelë. Vetëm kjo mund ta përligjë “arsyen” gazetareske për të denoncuar lapërdharinë e ish-lidershipit komunist, nisur nga rrëfenjat e një gruaje, pa kaluar në asnjë lloj filtri, sidomos atij kryesorit që ka të bëjë me interesin e publikut. Deri dje, ekzistonte “institucioni” ideologjik e gjysmë artistik, i quajtur “Rrëfimet e xhaxhi veteranit” – ose dhe pa ‘xhaxhi’ përpara – si një lloj investimi moral për brezin e ri, që të kalitej shpirtërisht me ndenjën e e sakrificës e betejave të paepura për socializmin. Më pas, u vijua me rrëfime të tjera allasoj, të “veteranëve” me ose pa damkë të vetë sistemit të rrëzuar, që të hapnin barkun me barkhapjen e tyre për të nxjerrë në dritë episode me Enverin e Ramizin. E tashmë, rrëfimet kanë marrë një tjetër kahje: atë të lloj-lloj eksperiencave personale nga anonimë të ndryshëm, lehtësisht të dallueshme për shkallën e lartë të hiperbolizimit, gjë që pleqëria e prodhon me shumicë. Rrëfimet e dikurshme të veteranëve, janë prova më e saktë për këtë. Çfarë na rrëfenin, nuk ishin realitete por filma!/E.H