SHËNIM: Së shpejti në përdorim gjuhësor: “Barsetat e Çuçit”!

Sikur Salvador Kaçaj të vinte nga e majta dhe e Bledi Çuçi nga e djathta, nga selia e PD-së, veç deklaratave të përditshme për shtyp lidhur me heshtjen e Ramës karshi dhunës në kuvend, marrëveshjes me CEZ, e së fundi dhe mbylljes së dhjetra universiteteve private, do kishim patur dhe një shtesë për kthimin e dhunës komuniste në emër të moralit komunist, për barseta deri tek “koci i partisë”. “Gangster me barseta” (favorita) adresuar ministrit Çuçi, mund të kishte ardhur prej kujtdo, veç jo nga Kaçaj.

Atë mund ta kish thënë një ish-sekretar partie, sidozot një ish-shok ideali i Berishës; mund ta kish thënë një burrë në moshë, me karakter pedant e me një rrjedhë jete pa shumë “rini” e andralla; mund ta kish thënë dhe një burokrat i lodhur, “mbetje” e ish-sistemit, inatçor me kohët e reja por të turbullta që kanë ardhur, por kursesi Kaçaj, një ish-futbollist i njohur, që mu për këtë profil, garipllëkun e ka patur veti të natyrshme, edhe nëse nuk është shprehur me barseta, por fjala vjen me ndonjë tendencë për një model flokësh ndryshe, komunikim ndryshe, veshje ndryshe apo pozim ndryshe. Ky është paradoksi i parë. I dyti është mesazhi i përçuar nga Kaçaj, ndoshta i ardhur nga subkoshienca, se një njeri me atë pamje prej gangsteri, sidomos prej barsetave të gjata, nuk mund të ketë asnjë lidhje me një Reformë Territoriale, një arsyetim që përçon vizionin e ngurtë, sipas së cilit, Reforma kërkon burra të pjekur e hijerëndë, kokëkthinjur, e ndoshta pak të kërrusur nga pesha e viteve dhe përvojave, e jo tipa që ngjajnë më itharë të përbetuar të Beatles apo Rrolling Stones, me simbole të tralalave rinore ende aktive.

Dhe kështu, “mustaqeve të Çelos”, që në gjuhën e popullit përdoret si kod shpjegues për kotësinë e ndonjë sherri mes dy palëve, i shtohet dhe “barsetat e Çuçit”, me autor jo ‘Popullin’, por Salvador Kaçajn. Përdorimi i parë, le të jetë pikërisht në debatet mbi Reformën Territoriale, ku Mazhoranca t`i drejtohet Opozitës, duke i thënë: Mos u kapni pas barsetave e Çuçit! Më pas, raste të ngjashme për përdorim ka plot. / E.H.