SHËNIM: Shpëtimi dhe 21 të shpëtuarit që shërbejnë si pikëpyetje

Padia e dytë ndaj kryebashkiakut socialist të Vlorës, Shpëtim Gjika, nuk erdhi si rrufeja në të kthjellët. Së pari, sepse vetëm për kthjelltësi nuk mund të flitet në këto ditë reshjesh të furishme, dhe së dyti, sepse shenjat nga organi i akuzës, ishin dhënë që Gjika mund të kishte vepruar edhe me ndërtime të tjera siç veproi me lejen e pallateve, për të cilat Gjykata e Faktit Tiranë e shpalli të pafajshëm para pak më shumë se dy muajsh: Vulosi vetë më parë letrat, pastaj rregulloji institucionalisht.

Kishte nga ata që menduan se akuza e parë ndaj Gjikës ishte një fillim i mbarë i luftës anti-korrupsion të qeverisë; kish të tjerë që ja atribuuan ngjarjen, përplasjeve që ai ka pasur më parë me kreun socialist Rama; dhe të tjerë akoma, që menduan se kjo ishte një shfaqje e prokurorisë. Pra, tregohet shpirt aksioni kundër korrupsionit të zyrtarëve, por gjykata e liron se dosja nuk është kopsitur mirë, apo se mungojnë faktet, dhe më pas i arrestuari del më i fortë se më parë. Ka pasur dhe arsyetime e hipoteza të tjerë në botën virtuale e atë reale, dhe jo më kot. Sepse në këtë vend kanë ndodhur nga të gjitha.

Ajo që shkaktoi habi, pra, këtë radhë ishin prangat. A është Shpëtim Gjika njeri i rrezikshëm shoqërisht; a mund të manipulojë ai provat për një ngjarje të ndodhur vite më parë, çka e shtyn gjykatën të firmosë prangat? Zor të besohet. Dhe pikëpyetja e djeshme mbetej pikërisht kjo: Pse vetëm ky? Pse jo prangat edhe për Xhelalin e Kamzës? Pse jo për Bashën?

Opozita doli dhe reagoi menjëherë, duke thënë se qeverisë i duhet një diversion i fuqishëm për të shpërndarë vëmendjen e publikut nga përmbytjet. Ata i dinë mirë këto punë se kanë një mësues të hatashëm për diversione; atë e kishim kreun e qeverisë djeshme. Ka edhe zëra se ngjarja e djeshme, që duket se e befasoi edhe vetë Gjikën dhe e trazoi fizikisht e psiqikisht, erdhi për të pastruar terrenin politik lokal në prag të zgjedhjeve të 21 qershorit për rivalë e deputetë lokalë; që nëse ai kishte qoftë dhe një fije besim se mund të kandidonte prapë, t’ia shkërmoqnin.

Ende nuk mund të vihet bast për asnjë nga gjithë këto variante e versione, por ajo që bie në sy është një këmbëngulje ndaj Shpëtim Gjikës. Ngjan se formulimi i akuzës dhe firma e arrestit me burg, është bërë e tillë që ai të provojë me patjetër qelinë për disa ditë.

Të kuptohemi, nëse gjykata e gjen fajtor, ai duhet jo vetëm ta provojë, por edhe ta jetojë qelinë, sipas ligjit. Kjo nuk ha diskutim. Ajo që ha diskutim, është përse në një listë prej 21 pushtetarësh lokalë të niveleve të ndryshme, që kanë prej dy vjetësh mbi supe dosje që po shfryhen rrugës, duke përfunduar ja me pafajësi, ja me truke procedurale, drejtësia shtyhet përpara vetëm në Vlorë?

Nëse ka më në fund një vullnet të palëkundur anti-korrupsion, pasi prangosën Shpëtimin, duhet të prangosin edhe 21 apo 221 të tjerët që paragjykimet të zhduken./DITA