SHËNIM: Statusi?! E rregullon PD-ja këtë punë!

Lajmi se Çekia mund të mos japë votën pro dhënies së statusit për Shqipërinë duke e kushtëzuar qëndrimin me fatin e kompanisë bujëmadhe Çez, ishte një furtunë në qiellin e kaltër për politikën dhe opinionin, përjetuar pasditen e djeshme, pas diellit të ngrohtë rrezëllues që la pas çeku fisnik, Stefan Fyle. Për një ironi fati, kjo ndodhi dhe pak orë pasi nga tryeza e kabashme blu  në SHQUP, Lulzim Basha ia faturoi partisë së tij gjithë meritën për marrjen e statusit, pra qeverisjes së ndritur të PD-së. Po në ka një tregues se ç`katastrofë ishte ai soj qeverisjeje, ishte pikërisht Çez-i. Vetëm po të ishte viti 1993, mund t`i përligjej një qeverie që të ishte aq e pazonja, aq dritëshkurtër, aq e paaftë, aq idiote, sa ta çonte rrotull me aq lehtësi e kapadaillëk një kompani e huaj, e ardhur sigurisht për të fituar e jo për të humbur. Dhe këtu është dallimi thelbësor, se ata, me drejtësi e dhelpëri, punojnë e jetojnë me kredon e të qënit fitues e përfitues në çdo situatë, në raport me ne që, humbjen, disfatën, dështimin,  e kemi shndërruar në diçka genetike, falë trapllikut të frikshëm që gjenerohet në qeverisjen e vendit, sidomos kur është PD-ja në pushtet. Por ka një shans. Dhe kjo është ironi mbi ironitë. Shansi vjen pikërisht nga PD-ja, rrahgjoksja e meritës për statusin. Ajo fare mirë mund ta marrë përsipër ta zgjidhë këtë nyje, edhe me legjitimitetin e një çorbe që është gatuar në kohën e saj kur ishte në pushtet, pa llogaritur këtu legjitimitetin që u jep dashuria e madhe për këtë vend, që prej afshit të pazakontë, e kanë përdhunuar para e mbrapa. Nuk ka pse druhemi t`ua kërkojmë këtë, si nder por dhe si detyrim, e po ashtu, dhe ata duhet ta kenë për nder ta marrin përsipër këtë mision të shenjtë. Meqë Basha thotë se statusin po e kemi prej tyre, edhe ne jemi plotësisht dakort që ta kemi prej tyre.  Momenti po iu thërret! A keni këllqe t`i përgjigjeni?!     / E.H.