SHËNIM: Ta bajmë mizën buell!

Ditën që disa të përditshme jepnin detaje rreth strategjisë së zgjedhur nga PD-ja për betejën politike të javës, sidomos atë të pritshmen në parlament ditën e enjte, ndodhi ajo që fare mirë mund të shërbejë si ilustrim i faktit se ndër morritë e metodave strategjike alla Berishë, pa asnjë thelb moral, është zgjedhur dhe me e ba mizen buell, në çdo rast e për çdo gjë. Dy deputetë të komisionit të ligjeve, Strazimiri e Prenga, u përlanë me njëri-tjetrin në korridoret e kryesisë së kuvendit, si dikur Imami e Paloka (në kohën kur i pari qëndronte ende mbi tank), incident të cilin Basha e quajti skenar të frymëzuar e përgatitur nga Rama, a thua se kishin rënë në dorë skica grafike nga dora e shefit të qeverisë me silueta deputetësh të tij duke rrahur kundërshtarët politikë. Parë nga një këndvështrim cinik, është  gjëja më normale që deputetët e parlamentit shqiptar dhe të kacafyten ndonjëherë fizikisht mes tyre. Madje e kundërta befason, kur publiku sheh skena të zakonshme shoqërore mes tyre, ndërkohë që janë çmeritur nga gjuha e urrejtjes që kanë konsumuar mes shoqi-shoqit. Pastaj, nëse nisemi nga urtësia e gjykimit popullor se fjala vret më shumë se dora, i bie që Sali Berisha të jetë një serial-killer. Rrahja që prej më shumë se 23 vjetësh që ai u ka bërë me gjuhë kundërshtarëve të tij, nuk është asgjë krahasuar me rripin e pantallonave të Prengës mbi fizikun e Strazimirit. Gjuha e Berishës ka qenë e është një allasoj kamzhiku e thupër thane bashkë, sa nëse do kishin lenë shenja në trupat e kundërshtarëve, nga vragët e tyre parlamenti ynë do kish patur deputetët më të përçudnuar fizikisht./E.HOXHA