SHËNIM: Të varfër, por seksi!

Pas ballafaqimit me botën nga `90 e këtej, i vetmi ngushëllim për shqiptarët ka qenë fakti se, të paktën femrat tona janë më të pashme se atje, në perëndim, në botën e zhvilluar.

E thënë ndryshe, janë më seksi. Kjo, pasi ndër mitet e ushqyera për një botë të shndritshme në të gjithë aspektet andej kufirit, ishte dhe ajo që femrat e tyre janë më rrëzëllitëse, pasi dhe ushqehen më mirë dhe nuk e kanë surratin me puçrra si tonat, ose me lëkurë të vyshkur nga mungesa e vitaminave. Në këtë mit, rol të madh kishin kryer dhe spektaklet e televizioneve italiane, apo filmat hollivudianë.

Por ja që nuk ishte krejt kështu; dhe nuk ishin të paktë shqiptarët që e prekën “botën e përtejme” të perëndimit, që u shprehën se ndër gjërat që nuk shkonin tek “ata”, ishin dhe femrat; aspak të bukura, si dhe, ose të kolme tej mase ose me fizik prej rakitikeje. Dhe ja tek vërtetohet kjo mbresë kur vjen lajmi se një portal i njohur çek ka konkluduar se femrat britanike nuk janë hiç të bukura.

Sipas asaj ç`ka është thënë në faqen e portalit, mis-i më i fundit në Britani, po të konkuronte në Çeki as në finale nuk do arrinte dot, e jo më të fitonte kurorën e bukurisë. E meqë Çekia i përket Lindjes, atje ku ishim dhe ne, kjo duket se jep orientit politik të vetmin avantazh karshi oksidentit. Thënë ndryshe, jemi vërtet më të varfër, por ama më seksi!