SHËNIM: Topi duhet të bëjë “tironcin”, e jo idhnakun në politikë

Te figura e Bamir Topit është parë gjithnjë një “tironc” i nevojshëm për politikën egërshane: me staturë të dukshme qytetare, i pashëm, me një fjalor të latuar mirë e pa rrëshqitje, ai ka qenë një amortizator i dallkaukllëkut në PD, një mbajtës balancash edhe krahinore; dhe mund të thuhet pa droje se më shumë nga sa mund të ketë marrë ai nga PD-ja, ka  marrë PD-ja nga ai, kuptohet Berisha.

Ka qenë gjithëherë e nuhatshme se Topi nuk ka patur ndonjë tërheqje kah Berisha si personalitet politik, por bindjet e djathta e kanë çuar në vathën blu, aq sa forcë kanë patur tek ai. Presidenca që ai fitoi nga Berisha, nuk ka qenë ndonjë majë pushteti e ëndërruar prej tij. Mungesa e një karrierizimi të thekur e të tepruar, ka qenë virtyt i tij në politikë.

Mangësitë e tij kanë qënë në të tjera drejtime, të cilat rezultojnë në fund me një mosmenaxhim të drejtë të potencialit të tij politik. Momenti që ia uli më tepër kreditet e personalitetit, ishte marrja e postit të presidentit në një mënyrë jo fort të ndershme, madje madje, të turpshme, ku 6 vota u blenë si mall pazari.

E vështirë të hidhet fall e të shihet se çdo mund të kishte ndodhur nëse ai nuk do e pranonte atë pazar, por të paktën do mbetej një “tironc” simpatik. Së fundi, i është përveshur Berishës me një fjalor, tipik për atë që  shumë ka duruar, e tanimë është moment t`ia kthejë reston. Por për Topin nuk është më hall Berisha; për të, hall është riformatimi i personalitetit politik, për t`u rifaktorizuar në politikën e ditë, si një “tironc” i nevojshëm, shumë më tepër se sa thjesht një kryetar partie. Dhe kjo rrugë, nuk kalon nga Berisha, sigurisht; edhe nëse i përvishesh!