Vdekja e Vaçes: dhimbje, keqardhje, konsiderata dhe…banalitet mediatik!

Si kryelajm i ditës dje, ishte largimi nga jeta e këngëtares së famshme shqiptare, Vaçe Zela. Vdekja e saj si lajm, pulsonte titrikisht në newsbar-et e televizioneve informative, duke u shoqëruar dhe me detaje si ora kur u shua, sëmundja e rëndë që vuante prej kohësh, si dhe fakti që u shua në Zvicër, atje ku pothuaj kaloi të gjithë moshën e tretë. Më pas vinin shprehjet e dhimbjes për ikjen e Vaçes, konsideratat për të, që erdhën nga shumë emra si Agim Krajka, Gaqo Çako, Zhani Ciko, Sherif Merdani,  Irma Libohova, Kozma Dushi, Liljana Kondakçi, Françesk Radi Bujar Kapexhiu,  e të tjerë të afërt në moshë e status me të sipërpërmendurit, edhe si bashkohës edhe si artistë të njohur. Tek e fundit, dje ishte dita e tyre të flisnin. Mirëpo kjo është Shqipëria ku çdo sens mase e humb kuptimin.  Në lajmet me titra ku renditeshin konsideratat për të ndjerën, nisën të ngatërroheshin emra artistësh e poltikanësh: herë dilte emri i Gaqo Çakos e herë ai i Kac Islamit; herë ai i Sherif Merdanit e herë ai ai i Lefter Kokës; herë ai Sidrit Bejlerit e herë ai i Sajmir Tahirit; herë ai i Dritëro Agollit e herë ai i Arben Ahmetajt. Në fakt, nuk ka asgjë të çuditshme në këtë mes, sepse Vaçe Zela vërtet ka qenë e të gjithëve, por ajo që është jo thjesht e çuditshme por krejt e çmendur, ka të bëjë me mosselektivitetin e disa mediave për t`i publikuar mesazhet ngushëlluese çdokujt; se fjala vjen, përse duhet ta dijë publiku se ç`mendon e ndjen Kaç Islami për Vaçe Zelën, duke qenë thjesht një deputet?! Ç`lloj statusi e bën të privilegjuar Saimir Tahirin për t`ju publikuar dhimbja e tij për të ndjerën, gjersa dhe posti që mban, ai i Ministrit të Rendit, nuk ka hiç lidhje me domenin e artit. Po Lefter Kokës përse i duhej publikuar?!  Dje ishte dita e artistëve, ata duhet të ishin më të privilegjuarit për të zënë hapësirat titrike; si dhe krerët e shtetit në një rang më të ulët, ministren e Kulturës. Edhe Gjykatës së Lartë iu publikua mesazhi mgushëllues përcjellë familjes! Por më falni, Kontrolli i Lartë i Shtetit nxorri ndonjë deklaratë ngushëlluese?! Po Inspektoriati i Kontrollit të Pasurive?!

P.S. Pyetje: Cili nga ata qindra e mijra që shprehën dhimbje për humbjen e Vaçes, njerëz anonimë apo publikë, artistë në profesion apo politikanë, vijonin të dëgjonin Vaçen në përditshmërinë e tyre, sidozot të kishin një CD me këngë të saj në automjetet private?! A mund të dalë kush të thotë se po, unë vijoja ta dëgjoja! Sa për kujtesë: Ndër më të dhimbsurit dje për vdekjen e Vaçe Zelës, ishte pa dyshim ai, S.B-ja. Mirëpo kur andej nga pranvera e vitit të kaluar, postoi ca preferenca të tij muzikore në FB, në përpjekje për të molepsur votuesit e rinj, Vaçen nuk e përmendi asgjëkundi. Tha se dëgjonte Gam-Gam Style dhe…Beyonce!  / E.H.