SHËNIM: Zahoja në “folenë e grenxave”…

Edhe tek emri i fëmijës, Rama ka provokuar.

Artistikisht, si në çdo gjë.

I ka vënë bebes së vet të sapoardhur në jetë, një emër që ngjan si tejet arkaik në raport me trendin e kohës, ose në raport me të birin, me emrin Greg-Gregor, që për atë kohë kur ka lindur, do ketë shprehur një manifest lirie duke ia vënë të tillë, që të kujton të madhin Gregori Peck.

Edhe në rastin e Zahos, çdokujt do i kenë ardhur në mendje Zahot që mund të kenë njohur në jetë.

Fjala vjen, personalisht njoh Zaho Vasilin, poetin e njohur të jugut, autor i sa e sa librave me poezi e tekstesh të këngëve nëpër festivalet e dikurshme në RTSH.

Por figura më e njohur publike me këtë emër, është ajo e Zaho Kokës, partizanit të pushkatuar për dashuriçka në mes zjarrit të luftës, së bashku me shoqen e tij të armëve, jo vetëm luftarake, Ramize Gjebrenë.

Edhe sikur të mos ekzistonte një shpjegim profesionist nga ana e Artan Shkrelit mbi emrin Zaho dhe origjinën e tij, do duhej menduar se Rama, assesi nuk ka mundur të mos e pleqërojë thellë me veten e bashkëshorten përzgjedhjen e këtij emri.

E kjo, jo vetëm nuk e ka ndalur, por e ka bërë më shpërthyese furinë e teorive konspirative, që kanë prekur ekstremet.

Të gjitha pra janë thënë, veç njërës, më kryesores, më njerëzores: T`i rrojë! T`i ketë shëndet e t`i bëhet i mbarë!

Dhe kjo nuk vlen vetëm për foshnjën e Edi Ramës, por çdo foshnjë të ardhur në këtë botë, edhe nëse prindërit i ka anonimë apo të njohur, i ka fshesaxhinj apo qeveritarë; e nëse prej të fundmëve, i ka të urtë, të ndershëm e punëtorë, apo pushtër e belaxhinj./ E.H.