O punën o zhurmën?!

Duke inaguruar një rrugë të shtruar në zonën e Selitës në Tiranën e re, kreu i Bashkisë Lulzim Basha, promovoi dhe një tezë me tharm moral, sipas së cilit, ai vetë udhëhiqet nga motoja: shumë punë e pak zhurmë! Dhe siç u pa nga kronika televizive, në inagurimin e rrugës, që në fakt ishte në parametrat e një rrugice lagjeje, ai shoqërohej nga një shpurrë njerëzish të përzgjedhur me kujdes, ku ndër to ishin dhe ca të moshuar, një grua me fëmijë të vogël në krah, si dhe Kastriot Islami. Panorama ishte ajo e një udhëhqeësi të ndodhur gjithnjë mes popullit, në krah të popullit e për popullin, një imazh që e zhvendoste në kohë Lulin, duke e shndërruar  atë me sfondin njerëzor përreth, në një tablo të levizshme të Realizmit Socialist.

Më zhurmë nuk kishte si të bëhej. I kishte dhe Rama të tilla butaforira, por koha në të cilën ai i shfrytëzonte, ishte kohë tjetër, kur për kryeqytetin ishte ngjarje vendosja brenda lagjeve e një llampe të zakonshme për ndriçim e jo më të shtroje rrugë, të mëdha apo të vogla, lagjeje apo ndërurbane. Shkurt dhe thjeshtë, nëse ka vendosur të promovojë moralin e punës së shumtë dhe e zhurmës së pakët, nuk duhet të kishte marrë pjesë në përurim. Dhe me stafin e tij të PR-së, duhet të kishte menduar ideimin e një skene, ku të evidentohej ky fakt, kjo zgjedhje, kjo praktikë e re, e ky moral i ri. Ashtu siç u bë, ishte krejt bajate. Siç ka aftësi t`i bëjë punët Luli. E.Hoxha