Studioja ligjore ku bën pjesë Erlind Basha, vëllai i kreut të Bashkisë së Tiranës, është subjekti i vetëm në garë për konsulencë të privatizimit të kompanisë shtetërore të sigurimeve INSIG. Gazeta Shqiptarja.com shkruan sot se në këtë garë, për të cilën opinionit nuk i është bërë gati asgjë e ditur, nga komisioni i vlerësimit janë përjashtuar të gjitha subjektet e tjera dhe ajo është kualifikuar e vetme për në fazën finale të vlerësimit të ofertës financiare. Juristë të kësaj studioje kanë qenë shpesh përfaqësues të Agjencisë së Burimeve Natyrore dhe enteve të tjera të Ministrisë së Ekonomisë në gjyqet që ky institucion ka pasur me biznese të ndryshme, të cilat kanë hedhur në gjyq ministrinë ose anasjelltas. Studioja ka bashkëpunuar ngushtë me qeverinë, në mënyrë të veçantë për ndërtimin e gazsjellësit më të madh në Shqipëri. “Ne kemi realizuar përfaqësimin e qeverisë së Shqipërisë për ndërtimin e kapaciteteve për zhvillimin e një projekti të tubacionit të madh të gazit prej 1 miliard euro, në bashkëpunim me dy konsulentë të tjerë ndërkombëtarë”, citohen juristë të kësaj studioje.