Veshkat preken nga një shumëllojshmëri sëmundjesh dhe çrregullimesh të saj. Në shumicën e sëmundjeve të veshkave, sulmohen njësitë e filtrimit të veshkave (nefronet) të cilat dëmtojnë aftësinë e tyre për të eliminuar mbeturinat dhe lëngjet e tepërta. Nuk ka asnjë shkak të vetëm të sëmundjes kronike të veshkave. Disa forma të sëmundjes mund të jenë të trashëguara, ndërsa të tjerat janë të fituara. Shkaku i sëmundjeve të veshkave, shpesh mbetet i panjohur, por sëmundja kronike e veshkave e cila sot po bëhet problem i shëndetit publik ka disa kushte apo gjendje që ndikojnë në zhvillimin e saj dhe janë të gjitha që kanë të bëjnë me ndërlikime si diabeti i sheqerit dhe tensioni i lartë në gjak, glomerulonefriti, sëmundjet e trashëguara, si sëmundja e veshkave polikistike, keqformime të lindura, lupusi dhe sëmundje të tjera që ndikojnë në sistemin imunitar të trupit. Gjithashtu ndikojnë edhe pengesat e shkaktuara nga probleme si gurët në veshka, tumoret apo një gjendrra e zgjeruar e prostatës tek burrat dhe infeksionet urinare të përsëritura. “Veshkat rregullojnë ekuilibrin e ujit në trup dhe përbërësve të tjerë kimikë në gjak si: sodiumi, potasi, fosfori dhe kalciumi, ato eliminojnë një sërë toksinash (helmesh) nga trupi ynë. Gjithashtu veshkat prodhojnë disa hormone, për shembull reninën që ndikon në presionin arterial, nxisin prodhimin e qelizave të kuqe në palcën e kockave dhe marrin pjesë në prodhimin e formës aktive të vitaminës D”, sqarojnë specialistët e ISHP, duke kërkuar vëmendjen makismale në përzgjedhjen e ushqimeve që duhen konsumuar gjatë ditës si dhe kontrolleve të vazhdueshme që duhen bërë tek mjeku specialist për të ndalur në kohë ndërlikimet që shfaqen në veshka.