Ministrja e Arsimit, Lindita Nikolla dhe deputetja Mimoza Hafizi janë përfshirë nga debatet gjatë mbledhjes së grupit parlamentar socialist.
Shkak është bërë një status në Facebook nga Hafizi e cila denonconte shkarkimin nga puna të një mësueseje.
Sipas Hafizit, arsimtarja është shkarkuar pasi ishte identifikuar si mbështetëse e Lëvizjes së Ben Blushit.
Këtë shqetësim ajo e ka ngritur edhe në mbledhjen e grupit të PS, pas largimit të ambasadorëve Lu e Vlahutin, raporton shqiptarja.com.
Nga ana e saj, ministrja e Arsimit, Lindita Nikolla është shprehur se pretendimet e Hafizit janë të pabaza, pasi mësuesja detyronte nxënësit që të ndiqnin kurset e saj private, në këmbim të një notë të lartë në lëndën që jepte. Gjithashtu, Nikolla ka theksuar se mësuesja në fjalë është aktualisht nën hetim.
Pjesë e debatit është bërë edhe kryeministri Edi Rama i cili i ka kërkuar Hafizit të mos përdorë atë gjuhë, pasi çështjen e ka konsumuar edhe mediatikisht. Pas këtij debati, deputetja Mimoza Hafizi ka braktisur mbledhjen e grupit parlamentar të PS.