Raporti për SHISH: Ajazi ka shkelur ligjin, por nuk kërkohet shkarkimi!

Komisioni Parlamentar i Sigurisë ka miratuar vetëm me votat e deputetëve të mazhorancës raportin për Shërbimin Informativ Shtetëror, i cili u paraqit nga deputetët Xhemal Qefalia, Piro Lutaj dhe Pjerin Ndreu.

Tre deputetët socialistë ishin pjesë e grupit të Kontrollit në zyrat e SHISH, ndërsa dy deputetë të opozitës nuk iu bashkuan kontrollit të ngritur nga Komisioni i Sigurisë.

Burime nga Komisioni bëjnë të ditur se grupi i kontrollit ka konkluduar në gjetjen e emërimeve në kundërshtim me ligjin, mbi të cilin bazohet funksionimi dhe organizimi i SHISH.

Gjithashtu konfirmohet si shkelje mjaft e rëndë gjetja e një shkresë, e cila iu është shpërndarë drejtorive të SHISH në rrethe, ku udhëzohet përgjimi i drejtuesve të policisë.

Raporti

Në raport theksohet se, “në Shërbimin Informativ Shtetëror, gjatë funksionit të kryerjes së detyrave ka mungesa dhe shkelje të ligjeve bazë dhe akteve normative”.

Po ashtu në raport thuhet se në veprimtarinë e këtij institucioni janë vërejtur tendenca për kontrollin e institucioneve të tjera, duke çuar kështu në mbivlerësimin e SHISH dhe shkeljen e ligjit.

Ndonëse burimet janë mjaft të kufizura për shkak të natyrës së sekretit shtetëror, raporti vëren mungesë të informimit të institucioneve me qëllim parandalimin e ngjarjeve kriminale të ndodhura në vend, të cilat u referohen disa prej informacioneve që SHISH i ka dërguar Ministrisë së Brendshme dhe Drejtorisë së Përgjithshme të Policisë.

Nuk dihet nëse ky raport do t’i paraqitet Kuvendit, apo Konferencës së Kryetarëve dhe nëse nga mazhoranca do të ndërmerren hapa të tjerë në drejtim të ndryshimit të ligjit për SHISH, apo drejtimit të shërbimit sekret shqiptar. Por, burime nga grupi i kontrollit thonë se në raport nuk kërkohet shkarkimi i Visho Ajazit.

Nuk thuhet specifikisht pse nuk është kërkuar shkarkimi i kreut të SHISH, ndërsa deputetët e Komisonit të Sigurisë thanë se të gjitha vërejtjet i kanë në raportin e paraqitur.