Komisioni i Disiplinës pranë Federatës Zvicerane të Futbollit ka dënuar me 3 ndeshje pezullim sulmuesin shqiptar të Baselit, Shkëlzen Gashi, për kartonin e kuq që 26-vjeçari mori në ndeshjen e fundit të kampionatit ndaj Zyrihut. Gashi i cili i hapi rrugën fitores 5-1 të Baselit teksa realizoi golin e parë të ndeshjes në minutën e 24-t, nuk i mbajti dot nervat pak çaste përpara përfundimit të pjesës së parë duke shtyrë kundërshtarin e tij, Avi Rikan, pas një ndërhyrjeje të rëndë që një futbollist i Zyrihut kishte kryer ndaj tij.
Në këtë mënyrë Komisioni i Disiplinës në Zvicër mori masën ndëshkuese duke e pezulluar me 3 ndeshje sulmuesin e përfaqësues kuqezi për gjestin që bëri. Gashi i cili kryeson listën e golashënuesve në Superligën zvicerane me 21 finalizime, do të mungojë në tre sfidat e ardhshme të Baselit që skuadra e Paulo Sousas do ti zhvillojë ndaj Sionit në transfertë, Lucernës në shtëpi dhe Vaduzit po në transfertë.
Shkëlzen Gashi është lojtari më në formë te Baseli gjatë këtij sezoni dhe mungesa e tij do të ndihet në skuadër. Gjithsesi 26-vjeçari shqiptar me këto tre ndeshje mungesë nuk rrezikon aspak fitimin e Këpucës së Artë në Zvicër për të dytin sezon radhazi, pasi ndjekësi i tij më i afërt, sulmuesi francez Guillame Horoau, ka realizuar deri tani vetëm 13 gola. Gashi do të kthehet të luajë sërish në sfidën mes Baselit dhe ish-skuadrës së tij Grasshopers e vlefshme për javën e 31-të të Superligës zvicerane.