Tallava dhe plumba në Shkodër: Vritet një vajzë dhe plagosen 2 persona të tjerë pas sherrit në lokal

UPDATE – DITA: Një krim i rëndë ka tronditur mbrëmjen e së shtunës qytetin e Shkodrës.

Konflikti që dyshohet se ka nisur brenda ambienteve të lokalit “Argent” me muzikë tallava në Bushat, ka përfunduar me shkëmbim zjarri me armë jashtë ambienteve.

Për pasojë një vajzë ende e paidentifikuar humbi jetën dhe mbetën të plagosur 2 prej burrave në konflikt, njëri prej të cilëve mendohet se ka qenë edhe shoqëruesi i viktimës.

Ngjarja ndodhi rreth orës 22:00, afër një kompleksi të njohur në këtë zonë, që ndodhet buzë aksit Shkodër-Lezhë.

Të plagosurit janë Selim A., 56 vjeç, nga Bërdica dhe Paulin N., 30 vjeç, nga Vau i Dejës, që ndodhen në spital.

Vajza mësohet se e ka humbur jetën në vend dhe trupi i saj u gjet brenda fuoristradës “BMW X5”, me targa SH 6969 E.

Deri në orët e vona janë kryer shoqërime të shumta të personave dëshmitarë, përfshirë personelin e lokalit dhe administratorët.

Paulin N., që është më rëndë, u dërgua në spital, kurse Selim A., është jashtë rrezikut për jetën. Të dy mbahen nën arrest deri në sqarimin e rrethanave.

Dyshohet se të dy personat kanë shkëmbyer zjarr me njëri-tjetrin pas një grindje në ambientet e brendshme për motive të dobëta.

Dyshohet se shkak janë bërë replikat ordinere për shikime dhe ngacmime.

Raportohet se fillimisht ka patur përplasje fizike mes palëve të ulur në tavolina të ndryshme. Pas kësaj pjesëtarët e tavolinës ku ndodhej vajza kanë dalë nga lokali i natës për t’u larguar.

Por autorët sipas dëshmitarëve, i kanë ndjekur nga pas dhe i kanë qëlluar me armë.

Në vendngjarje janë gjetur gëzhoja të shumta, ndaj mendohet se është përdorur më shumë se një armë dhe ka pasur shkëmbim zjarri nga të dy palët.

Burime nga policia thanë për DITA se kanë disa emra të personave të dyshuar të përfshirë në këtë konflikt.

Disa prej tyre janë i kanë ndjekur deri në fshatin Stakaj, zonë nga edhe janë larguar pas ngjarjes.

Dëshmitë e mbledhura kanë çuar tek emrat e atentatorëve, që thuhet se kanë qenë edhe klientë në lokalin e natës, por policia nuk i publikoi për shkaqe hetimore.

Po verifikohen rolet e dy të plagosurve, që ruhen me policë në spital, nën arrest për efekt të hetimeve. Grupi hetimor ka ngritur akuzën e “vrasjes me dashje”, “vrasjes së mbetur në tentativë” dhe “armëmbajtje pa leje”.

Në grupin hetimor bëjnë pjesë drejtuesit e policisë vendore dhe të prokurorisë / DITA