Shkodër, zbulohet baza e bombave me sahat, 2 të arrestuar

Një tjetër bazë eksplozivi u zbulua dhe godit në qytetin e Shkodrës ditën e djeshme. Janë dashur dy muaj përgjime dhe infiltrime të agjentëve që hiqeshin si pjesë e aktivitetit kriminal, për të zbuluar rrjetin e dyshuar. Forcat Operacionale të Policisë së Shtetit, finalizuan dje operacionin kundër trafikimit të bombave me telekomandë. U sekuestruan 4 mina me telekomandë të përgatitura, 6 kapsolla elektrike, aksesorë ndihmës për vënien në funksionim të minave me telekomandë, 4 armë zjarri pistoletë, rreth 30 fishekë pistolete, 50 fishekë automatiku dhe një silenciator. Burime zyrtare bënë me dije se bëhet fjalë për një trafik të pastër të eksplozivit të gatshëm dhe të armatimeve për qëllime kriminale, por do hetohet përfshirja edhe në atentatet e ndodhura në vend muajt e fundit. Rreth orës 18:00 të mbrëmjes u arrestuan edhe dy të dyshuarit Pjetër Babaj, 58 vjeç, banues në lagjen “Tre heronjtë” dhe Lulëzim Toska, 36 vjeç, banues në lagjen “29 Nëntori” të Shkodrës.

Fillimisht policia ka arrestuar në urën e Bunës, të dyshuarin Pjetër Babaj, i dënuar edhe më parë për trafik armësh. Në automjetin e tij, policia gjeti dy mina me sahat. Pas kontrollit të banesës në lagjen “Tre heronjtë” u bë e mundur të gjendeshin edhe minat e tjera, së bashku me kapsollat elektrike dhe aksesorët e tjerë. Bazuar në informacionet e mbledhura gjatë hetimit dy mujor, policia vijoi kontrollin në banesën e të dyshuarit tjetër Lulzim Toska, i cili dyshohet si bashkëpunëtor i Babajt. Në këtë banesë u gjetën 4 armë zjarri pistoleta dhe 1 silenciator. “Policia vazhdon punën për zbardhjen dhe dokumentimin e plotë të kësaj veprimtarie kriminale. Materialet proceduriale do t’i kalojnë Prokurorisë së Krimeve të Rënda për veprat penale të “trafikimi i armëve dhe municioneve” dhe do hetohen lidhjet me grupet kriminale që kanë kryer atentatet me eksploziv të muajve të fundit”, thanë burime zyrtare. Vlera në tregun ilegal e këtyre bombave shkon deri në 2 mijë euro për copë e gatshme.

Të arrestuarit:

Pjetër Babaj, 58 vjeç, i dënuar më parë

Lulëzim Toska, 36 vjeç, Shkodër

Sekuestrimet:

4 mina me telekomandë të përgatitura

6 kapsolla elektrike

aksesorë ndihmës për minat

4 armë zjarri pistoletë

30 fishekë pistolete

50 fishekë automatiku

1 silenciator