Kreu i SHISH-it do thirret në Kuvend. Braho: Përgjimi, skandal që nuk u guxua as në kohën e Koçi Xoxes

Nga Habjon Hasani

Në vitin 2010, në kohën kur SHISH drejtohej nga Bahri Shaqiri, ndodhi futja e 4 minave të telekomanduara në territorin shqiptar nga Mali i Zi. SHISH-i asokohe kishte nën kontroll poseduesit e 3 prej këtyre minave por për të katërtën nuk dihej asgjë, poseduesi kishte vepruar me shumë kujdes dhe kishte humbur çdo gjurmë. SHISH-i nuk e dinte ku kishte përfunduar kjo minë e telekomanduar dhe kaq ishte e mjaftueshme që e gjithë struktura e këtij institucioni ta kishte prioritet Nr.1 zbulimin e tij, deri sa dhe e gjetën se kush e mbante. E sjellim këtë histori në vëmendje pasi sot Shërbimi Informativ shfaqet përballë dy të dhënave që kurrsesi nuk mund të trajtohen si të shkëputura nga njëra-tjetra. E para, Shqipëria është përfshirë nga një valë terrori me shpërthime të telekomanduara dhe në bazë të ligjit të vendit, kjo lloj veprimtarie është objekt ekskluziv i punës së SHISH. E dhëna e dytë lidhet me faktin se sot ish-qeveria dhe sidomos Berisha kanë drejtuar gjithë linjën e përgjegjësisë për shpërthimet tek policia, ndërsa SHISH, siç zbulohet së fundmi, ka drejtuar gjithashtu që prej Dhjetorit 2013 me prioritet vëmendjen e saj ndaj….drejtuesve të policisë.

Këto janë dy të dhëna shumë të rëndësishme për të kuptuar në “makro” atë që është duke ndodhur.

Bombat dhe minat e telekomanduara klasifikohen si armë të shkatërrimit në masë.  Kjo kategori arme ka si qëllim shfarosjen në masë dhe goditjen me efekte psikologjike. Duke qenë se arma mbart këto elementë, aktet e sulmeve me këtë armë në kohë paqeje, konsiderohen dhe klasifikohen automatikisht si akte terroriste. Janë akte që cenojnë drejtëpërdrejt sigurinë kombëtare të vendit. Për shkak dhe të këtij klasifikimi institucioni direkt përgjegjës për hetimin dhe mbajtjen nën kontroll të tyre është as më shumë e as më pak se sa Shërbimi Informativ i Shtetit.

Por çfarë ka ndodhur? Në fillim të muajit Dhjetor, SHISH, ka nisur hetimet e thelluara dhe në kushte paligjshmërie ndaj drejtuesve të policisë. Ndërsa një muaj më vonë, në janar, shpërthimet me mina të telekomanduara kthehen në një “modë”. E fundit u regjistrua 48 orë më parë. Përgjatë dy muajve vale shpërthimesh terroriste në Shqipëri, Berisha dhe opozita kanë bërë përgjegjëse ekskluzivisht policinë dhe “paaftësinë e drejtuesve të saj”, drejtues për të cilët, SHISH-i ishte angazhuar me interes të veçantë për t’i hetuar.  Krahasimi i të dhënave tregon qartë se SHISH ka bërë si objekt të punës së vetë, axhendën e Berishës. Por nëse Berisha është komod (akoma) dhe flet e thotë çfarë i teket nga “Facebook”-u, SHISH-i është institucion në detyrë, madje është përgjegjës ekskluziv për krijimin e situatës së terrorit të krijuar nga vala e shpërthimeve.  Ndaj është e ekspozuar tashmë dy herë, një herë si përgjegjëse institucionalisht për dështimin e parandalimit të këtij aktiviteti dhe një herë tjetër si institucion që është vënë tërësisht nën kompetencat e një partie dhe që ka tejkaluar dhe shkelur rëndë funksionimin e tij Kushtetues.

“Veshët e Vishos” duket se po shkojnë pikërisht atje ku nuk duhet. Për më tepër që e gjithë shoqëria shqiptare tashmë ka nisur të jetojë nën terrorin e shpërthimeve të njëpasnjëshme, për të cilat SHISH është përgjegjëse me ligj për ti parandaluar dhe hetuar.  I gjithë ky terror për çfarë? Arsyet mund të jenë të shumta dhe me siguri kërkojnë hetim profesional, por i sigurt është tashmë fakti që SHISH ka nisur të bëhet i rrezikshëm. Në mos i rrezikshëm në bashkë- frymëzimin e qëllimshëm të kësaj klime terrori, doemos është bërë i rrezikshëm me paaftësinë e saj për të parandaluar këtë terror dhe me papërgjegjshmërinë e veprimeve dhe aksioneve.  E, në kushtet kur një institucion rezulton dhe identifikohet si i rrezikshëm për sigurinë e vendit, zgjidhja e këtij problemi kërkon urgjencë dhe masa të menjëhershme për disiplinimin e tij.

Interesi publik dhe siguria kombëtare prevalon  mbi gjithçka. Në çdo vend normal kjo do ishte situatë e mjaftueshme për t’i shkulur jo vetëm veshët, por edhe ca më tepër se kaq kreut të SHISH. Dilema mund të kenë vetëm ata që ose nuk e kuptojnë çfarë po ndodh, ose ata që me Vishon dhe Berishën kanë plane të tjera nga ajo që kërkojnë me ngulm qytetarët e Shqipërisë: normalizimin e vendit.

* * *

 “Alarmi” në janar: Visho Ajazi ka rikthyer kuadrot e Gazidedes në detyrë

 Rikthimet dhe emërimet në shkelje të plotë dhe të hapur të ligjit për statusin e punonjësit të Shërbimit Informativ Shtetëror, kanë qenë fokusi i investigimit të emisionit “Alarm”. Me emërimin e Drejtorit Visho Ajazi Lika në krye të Shërbimit Informativ Shtetëror në gusht të vitit 2012, kanë ndodhur ndryshime të rëndësishme në personel e sidomos në kupolën drejtuese të tij. Nga një anë kemi ish-punonjës të viteve ‘92-‘97 të rikthyer dhe emëruar në poste të larta drejtuese. Pasi kanë qenë të larguar për shumë vite nga ky shërbim, rikthimi i tyre është vlerësuar duke ju dhënë mundësi që ata të mbajnë tani poste të rëndësishme drejtuese. Së dyti, punonjës të dikastereve të tjera të emëruar në kundërshtim me statusin e punonjësve të SH.I.SH pranë këtij të fundit, por edhe punonjës të mbetur nga vitet ‘92-‘97, promovuar me ndryshimet e fundit, në pozicione drejtuese. Megjithëse një institucion që në bazë të punës së tij ka sekretin, gazetarët kanë arritur të zbulojnë se edhe pse në mungesë të disa kushteve si kursi bazë , apo kushti i sigurisë , këta punonjës janë sot kupola e SHISH. Rasti më flagrant është ai i një ish-punonjësi të Gardës së Republikës, i cili ka shërbyer më herët si truprojë i z. Lika, emëruar direkt kryetar dege pa qenë më parë i emëruar në nivel më të ulët, atë të inspektorit.

* * * 

Klosi: Veprimi i SHISH është tërësisht i paligjshëm, duhet hetuar gjithë procedura

Zoti Klosi, ju keni drejtuar shërbimin inteligjent për disa vite. Çfarë menduat kur patë atë shkresë të SHISH që inicionte një hetim të thelluar për zyrtarët dhe drejtuesit e policisë?

Menjëherë mu krijua ideja e paligjshmërisë, pasi ky lloj urdhri bazuar në ligjin për SHISH dhe mënyrën si funksionon institucioni është një lloj urdhri që vjen vetëm pasi ka një orientim nga kryeministri i vendit, pasi ai është eprori direkt i kryetarit të SHISH. Nëse shikoni shkresën urdhri në fjalë nga ana e SHISH është hartuar në fillim të muajit Dhjetor, pra kur qeveria Rama nuk kishte as 3 muaj që kishte ardhur në pushtet dhe në këtë kontekst më duket gati e pamundur që kjo të jetë një lëvizje me autorizim apo me kërkesë të kryeministrit të vendit.

Zoti Klosi, sipas jush, cilat do ishin rrethanat institucionale që do e bënin krejt normal lëshimin e një urdhri të tillë nga SHISH për hetimin dhe mbledhjen e informacionit për zyrtarët e policisë?

Nëse kryeministri i vendit do i kishte kërkuar kreut të SHISH informacione mbi efektivë apo drejtues të policisë, atëherë çdo gjë do të ishte më se normale. Pasi raporti nga SHISH të hartohej, si rregull konkluzionet dhe informacionet e raportit do t’i përcilleshin kryeministrit dhe më pas ky mund t’ia niste ministrit përkatës, që në këtë rast është ministri i Brendshëm, për të marrë dhe masat e nevojshme.

Nga sa keni parë dhe jeni njohur deri më tani me këtë çështje, në vlerësimin tuaj zoti Klosi, cila është masa e përgjegjësisë e vetë kreut të SHISH, Visho Ajazi?

Nga dokumenti i bërë publik, rezulton se urdhri është dhënë nga një drejtor drejtorie. Pra nga një vartës i kreut të SHISH. Në dokument nuk ka referencë se ky urdhër është pasojë e ndonjë urdhri që ka marrë drejtori nënshkrues prej kreut të SHISH. Një hetim i kësaj procedure është i nevojshëm për të zbuluar nëse përgjegjësia shkon deri tek drejtori që ka firmosur apo ka ndonjë urdhër që nuk është bërë publik që implikon dhe zyrtarë më të lartë se ai.

Pra me kaq të dhëna sa kemi nuk ka një implikim të drejtpërdrejtë të kreut të SHISH?

Struktura e SHISH është piramidale, ndaj dhe për të parë se deri ku shkojnë përgjegjësitë duhen bërë të tjera kërkime apo hetime. Deri më tani firma e drejtorit rezulton si nismëtare e kësaj lëvizje. Por ajo që mendoj unë se duhet vënë theksi është pyetja se ku janë dërguar këto informacione? Kujt do i hynin në punë? Se personave që u ngarkon ligji për t’i kërkuar dhe për tu njohur me to, në këtë rast kryeministri, me sa duket nuk kanë lidhje me këtë lëvizje dhe këtë nismë të SHISH-it.

* * * 

Spartak Braho: As në kohën e Koçi Xoxes nuk ka ndodhur një skandal i tillë

Shkresa përmes të cilës Shërbimi Informativ Shtetëror vë nën përgjim drejtues të lartë të Policisë së Shtetit është konsideruar antiligjore nga kreu i Komisionit për Sigurinë Kombëtare, Spartak Braho.

Sipas tij, ky është një skandal i përmasave të mëdha sa kohe një strukturë shtetërore si SHISH angazhohet për një veprim të tillë me prapavijë sipas tij të qartë politike. Duke shprehur dijeni të plotë për këtë dokument, zoti Braho tha se veprime të tilla nuk janë ndërmarrë as gjatë kohës së diktaturës.

“Janë totalisht jashtë objektit të përcaktuar nga ligji për organizimin e funksionimi i SHISH. Kemi të bëjmë më një kërkesë të kundërligjshme, madje me elementë të veprës penale, shpërdorim i detyrës më e pakta. Po të sjellim për analogji, as në kohën e Koçi Xoxes nuk janë bërë këto dhe kur tentoi t’i bënte Enveri i preu kokën. E thënë me atmosferën që përjetojmë, duket si një axhendë zyrtare e përputhur me një axhendë politike. Axhenda zyrtare e SHISH, ndërkohë që është axhenda e Partisë Demokratike, e cila po merret me këtë situatë duke akuzuar mjaft drejtues të policisë për implikime në krim”, – deklaroi Braho.

Për të dhënë sqarime lidhur me këtë çështje, zoti Braho theksoi se kreu i Shërbimit Informative Shtetëror do të thirret në Komisionin e Sigurisë Kombëtare, ku do të kërkohet informacion më i detjuar për atë që ai e quajti një skandal i paprecedent.

“Do ta shohim me gjakftohtësi situatën dhe do të informojmë në radhë të parë Parlamentin dhe në radhë të dytë presidentin e kryeministrin, i cili është personi direkt që është i ngarkuar me mbikëqyrjen e ligjit për SHISH-in. Natyrisht, kemi të bëjmë me një informacion i cili shprehet se brenda 2 ditësh, të dhënat duhet të grumbulloheshin. Do të kërkojmë ku janë këto pasi ministri i Brendshëm nuk ka të dhëna, ndërsa ishte detyra e drejtuesve të SHISH të informonin ministrin. Kemi të bëjmë me një shkërmoqje të kësaj strukture. Nuk e di, është mjaft e rëndë!”, -tha Braho. TCH