Pas një loti pikëllimi,
një buzëqeshje do të ndrijë,
pas një çasti hidhërimi,
një gëzim i ri do vijë.
Pas një fjale lamtumire,
të pret sërish një takim,
pas një nate errësire,
vjen patjetër një agim.
Po u vyshk një lule zemre,
po u tret një shpresë rinie,
do çeli në zëmrën tënde,
tjetër lule dashurie.
Krejt papritur ndonjë ditë,
mund të thahen edhe detet,
po në zëmrën njerëzore,
shpresa dhe besimi mbetet.
Se pas ikjes së një plaku,
lind një foshnjëz tërë dritë,
se pas ikjes së një nate,
vjen me gaz një tjetër ditë.
Se kështu ka qenë përhera,
se pas dimrit vjen pranvera,
se pas lufte vjen një paqe,
treten lotët përmbi faqe.
A.Duka