Shqipëria, e fundit në rajon për klimën e biznesit të huaj

Shqipëri është e fundit në rajon për klimën e biznesit. Një studim i kryer nga Dhoma e Tregtisë dhe Industrisë Gjermane, Shqipëria renditet e fundit në listën e 16 vendeve të rajonit për kushtet që u krijon investimeve të huaja.

“Ndërmarrjet gjermane në Shqipëri perceptojnë se ka një përkeqësim të klimës së biznesit  në vendin tuaj. Dhe kjo ka ardhur më tepër si pasojë e imazhit të keq të krijuar për Shqipërinë. 64% e ndërmarrjeve të anketuara mendojnë se situata ekonomike po përkeqësohet gjithmonë e më shumë. Natyrisht për këtë kanë ndikuar edhe efektet e krizës, të cilat e prekën më vonë Shqipërinë e megjithatë pavarësisht këtyre ekziston edhe optimizmi se në të ardhmen do ketë një përmirësim të gjendjes ekonomike. Cilat janë detyrat më urgjente? Ato  janë zbatimi i ligjeve, zhvillimi i infrastrukturës, furnizimi me energji elektrike, përmirësimi i sektorit të ujësjellës-kanalizimeve, largimi dhe trajtimi i mbetjeve si dhe investimet në arsimin profesional. Përmirësimi në sektorin e arsimit profesional mundëson vende pune për persona që kanë kualifikim të ulët, të cilët janë urgjentisht të nevojshëm për industrinë prodhuese”, ka thënë presidentja e këtij institucioni, Andrea Gebbeken.

Dy shkaqet kryesore për një renditje të tillë në krahasim me vendet e rajonit janë korrupsioni dhe kriminaliteti. “Në vlerësimin e kushteve të vendit si destinacion investimesh, kompanitë e pyetura vazhdojnë të shohin nevojën për përmirësim të dukshëm. Rezultatin më të keq e merr faktori “Korrupsioni dhe kriminaliteti”. 55% e e të anketuarve shprehen se janë shumë të pakënaqur me “Luftën ndaj korrupsionit dhe kriminalitetit”. 52% e kompanive të pyetura janë të pakënaqura me “Administratën Publike” dhe kërkojnë që procedurat në administratën publike të jenë më transparente. 48 % janë të pakënaqur me ”Parashikueshmërinë e politikave ekonomike”.