Shqiptarët duket se kanë gjetur një mënyrë të re për të mbërritur në “tokën e premtuar”, atë përmes Meksikës. Të paktën 38 shqiptarë janë kapur kohët e fundit duke kaluar kufirin që ndan Meksikën me SHBA në luginën Rio Grande.
Agjencia e lajmeve e kësaj zone, e cila u referohet të dhënave zyrtare të autoriteteve të rendit, thotë se gjatë viti 2011 mes emigrantëve të paligjshëm që tentonin të hynin në tokën amerikane janë kapur edhe 38 shqiptarë. Shifrat e regjistruara në vite tregojnë se numri i klandestinëve shqiptarë ka ardhur duke u rritur.
“Emigrantët e paligjshëm janë nga Meksika dhe Amerika Qendrore, por ka edhe nga vende si kina dhe India. Por kohët e fundit ka tërhequr vëmendjen një grup emigrantësh që vijnë nga Shqipëria, një shtet i vogël që shtrihet në Europën Juglindore”, thuhet në shkrimin e agjencisë së lajmeve.
Largimi nga vendi ka si arsye kryesore situatën e krijuar nga gjendja e vështirë ekonomike, krimi në rritje, korrupsioni dhe gjakmarrja. Fillimisht, shqiptarët aplikojnë për vizë turistike në Meksikë, të cilën më pas e përdorin si trampolinë për t’u hedhur në SHBA.
Sipas të dhënave të publikuara nga policia në Rio Grande Valley, në vitin 2008, shifra e shqiptarëve të kapur në kufi ishte 8, në 2009-n janë kapur 20, në 2010-n janë kapur 21 dhe në 2011 – 38. Pritet që në raportin e vitit 2012 ky numër të jetë akoma më i madh.