Tifozë të shumtë përkrahën Bamberg kundër Partizanit të Beogradit në basketboll
Shqiptarë të shumtë i erdhën në ndihmë skuadrës gjermane të basketbollit Bamberg, në ndeshjen vendimtare të Euroligës, përballë Partizanit te Beogradit. Thirrjet “Kosova, Kosova” dhe “Shqipëri Etnike” ndezën pallatin e sportit të Bambergut, në Gjermani, ku të enjten u zhvillua ndeshja vendimtare që përfundoi në favor të vendasve, 92-90. Të motivuar nga emri i kundërshtarit, Partizani i Beogradit, qindra shqiptarë dhe kosovarë me banim në Gjermani u paraqitën në pallatin e sportit, për të mbështetur skuadrën vendase, që siguroi biletën e kualifikimit midis 16 skuadrave më të mira të basketbollit në kontinent. Lajmi u raportua gjerësisht në mediat serbe, ku nuk pritej një atmosferë e tillë armiqësore në qytetin e vogël të ndodhur në krahinën e Frankonisë, në Gjermani.