Shtatorja e Geraldinës – një turp dhe provokim ndaj ndjenjave kombëtare

Deklaratë e Kryesisë së Komitetit Kombëtar të Organizatës së Veteranëve dhe Pasardhësve të LANÇ të Popullit Shqiptar “Nderi i Kombit”

Ngritja e shtatores në qendër të Tiranës së Geraldinës, bashkëshortes së ish “mbretit” Ahmet Zogu, një turp dhe provokim ndaj ndjenjave kombëtare

Kryesia e Komitetit Kombëtar të Organizatës së Veteranëve dhe Pasardhësve të LANÇ, ngjarjen e sipërme nuk e konsideron të rastit dhe as si një akt miqësie i bashkëpunimit të Bashkisë së Tiranës me atë të Budapestit Hungarez, sikurse u shpreh kryetari i Bashkisë së Tiranës në fjalën që mbajti në ceremoninë e ngritjes së shtatores (!), sepse ka plot simbolika të tjera për të patur një bashkëpunim me bashkinë e Budapestit, e jo të gjendej një rast i tillë, i cili nuk e nderon as Bashkinë e Tiranës dhe aq më pak Shqipërinë.

Përkundrazi, vendosja e asaj shtatore, e një zonje, pa asnjë kontribut dhe për faktin se në Tiranë e në Shqipëri ajo qëndroi vetëm disa muaj dhe, për më tepër, se duke qenë bashkëshorte e ish “mbretit” Zog, i cili në momentet më të vështira të pushtimit fashist më 7 prill 1939, të dy braktisën vendin, u arratisën, duke grabitur edhe Thesarin e shtetit shqiptar, të cilin në azil ku jetonin, me ato para sponsorizonin banda diversantësh e kriminelësh, të cilët i dërguan në Shqipëri, duke kryer akte të rënda vrasjeje, shkatërrime etj, e bën të papranueshëm një veprim të tillë.

Për këtë arsye, Kryesia e Komitetit Kombëtar të Veteranëve dhe Pasardhësve të LANÇ, veprimin e sipërm nga pushteti vendor i Tiranës dhe i qeverisë së vendit tonë, e konsideron jo vetëm të gabuar, por dhe një veprim që cenon rëndë nderin dhe dinjitetin e popullit patriot shqiptar, i cili e ka damkosur çiftin Zogu si tradhtarë dhe hajdutë.

Duke qenë se veprime të tilla, kur tradhtarë e kolaboracionistë me pushtuesit e huaj, janë rehabilituar e, madje u janë bërë ndere e ceremoni, si në rastin e Mit’hat Frashërit, Preng Calit, Hamit Matjanit etj, në një kohë që heronjve e dëshmorëve të epopesë së lavdishme të LANÇ-it që dhanë jetën në lule të rinisë, si Qemal Stafa e shumë të tjerëve, u janë hequr emrat nga institucionet, rrugët e shkollat, të ndodhura këto për fat të keq, kur pushtetin e kanë forcat e majta, përbën një shqetësim serioz, i cili duhet të tërheqë vëmendjen e të bëhet objekt analize nga Kryesia e Partisë Socialiste, e cila, në programin e saj e ka të sanksionuar mbrojtjen e idealeve e të vlerave të LANÇ-it, të gjakut të derdhur dhe sakrificave të mëdha të popullit patriot shqiptar; ashtu  dhe nga Kryesia e Kuvendit të Shqipërisë si garant ligjor i fitoreve të popullit shqiptar.

Duke iu prerë rrugën këtyre veprimeve të mbrapshta do të evitohen edhe reagime e veprime që mund të ketë  në të ardhmen nga patriotët e vërtetë që u dhimbset vendi, përfshi dhe Organizatën e Veteranëve e të Pasardhësve të LANÇ.