Si do jetë ky vit i ri shkollor, a po vepron drejt Ministria dhe një përvojë personale me Covid-in. Intervistë në DITA me profesor Jetmir Aliçkën

Intervistoi Entela Resuli

Botuar në DITA

Sistemi arsimor ka kaluar dy vite të vështira. Për herë të parë është përballur me një pandemi botërore ku është detyruar herë të mbyll dyert e shkollës dhe herë të zhvillojë mësim në platformat online. Për Shqipërinë një terren i ri ky, jo shumë i praktikuar më parë. Sapo kemi hyrë në vitin e tretë të kësaj periudhë, ku me sa duket do përballemi sërish me masa kufizuese.

Në fillim të këtij viti shkollor ne kemi folur me një nga njerëzit më me eksperiencë në fushën e arsimit. Jetmir Aliçka ka një përvoje 45 vjeçare në fushën e edukimit, 44 prej të cilave ka shërbyer si drejtues shkolle, drejtues i Institucioneve arsimore në qytetin e Tiranës, drejtues dhe ekspert i shoqërisë civile në fushën e edukimit. Sot ai drejton një nga shkollat private elitë të kryeqytetit, shkollën 12-vjeçare, “Elitë”.

Kjo është një nga periudhat më të ngjeshura të vitit për të pasi regjistrimet e reja, bisedat më prindërit, mbledhjet me stafin pedagogjikë janë intensive; pasi ka lënë pas Covidin i cili i ka hequr disa kilogram në trupin e tij, tashmë është gati për një fillim të ri, me masat që janë marrë, por edhe në mënyrën e punës.

Më poshtë biseda në Dita me profesor Jetmirin:

– Profesor, shkolla ka kaluar 2 vite të vështira, me ndërprerje, prej pandemisë, mësim online, sa mendoni se i ka penguar kjo në punën e tyre, mësuesit dhe nxënësit?

Padyshim, që kanë qenë 2 vite shumë të vështirë për të gjithë, por, bazuar në studime të mirëfillta, edukimi, shkolla, nxënësit kanë qenë ndër më të dëmtuarit e mëdhenj. Është dëmtuar misioni i shkollës, si institucioni unikal që prodhon dhe rrezaton edukim.

Shkolla e mirorganizuar e mirekonsoliduar ndër vite, bazuar në rregulla, rregullore, struktura, kurrikula, burime njerëzore e materiale, nuk është më, ajo e mëparshmja, sigurisht jo për faj të saj. Është dëmtuar procesi i nxënies. Nxënësit, në rastin më të mirë, mësojnë në shkollë me orë mësimore të reduktuara dhe me turne, në rastin më të keq, qëndrojnë me orë të tëra para xhamit të akullt të kompjuterit, Iphon-it.

Nxënësve j janë kufizuar gjithnjë e me shumë lojërat, komunikimi, shoqërizimi. Ata janë të dënuar të komunikojnë, të luajnë , të mësojnë , në shumicën e kohës nëpërmjet këtij xhami të akullt. Të jemi realistë, fëmijët dhe adoleshentët nuk po jetojnë dhe shijojnë fëmijërinë dhe adoleshencën e tyre. Atyre ju mungon normaliteti dhe kjo nuk është pak.

Mësuesi, në rastin më të mire ndërton dhe realizon procesin e nxënies e mësimdhenies në vetëm 20 – 25 minuta në klasë dhe në rastin më të keq, edhe ai, përpara xhamit “të akullt” komunikon me nxënësit e tij. Një nxënie e mësimdhënie virtuale. Padyshim, një cilësi e dyshimtë.

– A e kaluan provën mësuesit, pasi për here të parë e përdorën kaq intensivisht metodën online?

Për hir të së vërtetës, duhet të pranojmë që mësuesit kanë përballuar me sukses sfidën e një procesi nxënie mësimdhënie online. Ata, që në ditët e para të kalimit të mësimit online, shumë shpejt, individualisht apo të organizuar në bazë shkolle, apo edhe në nivel zyrash arsimore arritën të trajnohen e kualifikohen për përdorimin e mjaft platformave si What’s up, google classroom dhe zoom.

Ata nxitën e motivuan me durim dhe efikasitet nxënësit dhe prindërit e tyre për të marrë pjesë në aplikimin e këtyre platformave. Provën, mendoj që ata e kaluan që vitin e parë. Vitin e dytë ata, tejet të sigurt, vetëm kanë përsosur performancën e tyre.

Por duhet të pranojmë gjithashtu, që pavarësisht performancës së tyre, efikasiteti i mësimit online nuk mund të kalojë më shumë se 50 – 60 % në raport me mësimin në klasë.

-Si e parashikoni këtë vit që sapo ka filluar?

Është vështirë të parashikosh, pasi gjithçka varet nga ecuria e pandemisë. Nga çfarë po ndodh aktualisht, mendoj se shumicae shkollave do të punojnë me orë mësimore të reduktuara, me turne. Nuk besoj se do t’i kthehemi masivisht mësimit online.

Nëse qëndrojnë përfundimet e studimeve shkencore të deritanishme, sipas të cilëve fëmijët infektohen më pak dhe e kalojnë më lehtë, plus fakti qe vaksinimi po ecën, por edhe që mutacionet e Covid-it janë të panumërt dhe nuk i ndalon dot, do të thoja që po shkojmë drejt pranimit tê një bashkëjetese me Covidin. Pra jemi duke shkuar gradualisht drejt një normaliteti të ri, të pranueshëm nga të gjithë, ku shëndeti i fëmijëve duhet të prevalojë mbi gjithçka.

– Ministria e Arsimit ka vendosur që kjo periudhe deri me 27 shtator të shërbejë si kohë përsëritëse a e konsideroni të drejtë?

Për mënyrën si është zhvilluar mësimi vitin e kaluar shkollor, mendoj se një periudhë përsëritje do të duhej dhe mendoj se vendimi i Ministrisë është pozitiv. Por ajo që më shqetëson është fakti që frekuentimi shkollës, si edhe zhvillimi i përsëritjes, apo në vend të përsëritjes, zhvillimi i veprimtarive jashtë kurrikulare, është lënë në dëshirën e nxënësve dhe prindërve të tyre.

Mendoj se në këtë mënyrë brenda një klase, brenda një shkolle, qasja dhe starti i nxënësve nuk është i njëjtë. Mendoj se ky vendim nuk duhet të ishte kaq evaziv.

– Po në shkollën tuaj, si është përballuar viti që lame pas dhe sa jeni përgatitur për këtë vit?

Shkolla Elitë që unë drejtoj, për shkak të një numri jo shumë të madh nxënësish rreth 380 dhe infrastrukturës së saj, ka krijuar mundësi menaxhimi më komode, për të respektuar protokollet e Ministrisë së Arsimit dhe Shëndetësisë.

Vitin e kaluar shkollor falë një investimi në zëvendësimin e bangave dyshe ne banga teke, zbatimit të një higjiene intensive, u krijuan mundësitë për të zhvilluar mësimin normalisht konform protokolleve. Pra mësim në klasë dhe jo me turne, mësim në klasë dhe jo i reduktuar. Edhe këtë vit , po kështu mësimi do të zhvillohet normalisht.

-Në gjykimin tuaj a e ka menaxhuar mire Ministria e Arsimit këtë periudhë?

Duke marrë në konsiderate infrastrukturën e shkollave tona, megjithë përmirësimet e bëra këto vitet e fundit, mendoj se Ministria ka zgjedhur alternativat e duhura. Prevalimi i shëndetit të fëmijëve dhe zbatimi i protokolleve kushtëzojnë mësimin e reduktuar dhe atë me turne. Nuk besoj, se në këto kushte do të gjendej një zgjidhje më e mire.

Po ashtu, përgatitja e orëve mësimore dhe transmetimi i tyre ne televizion, konsiderohet një investim shumë pozitiv i Ministrisë së Rinisë dhe Sporteve në ndihmë të fëmijëve, që nuk sigurojnë internet, por jo vetëm.

–A jeni vaksinuar ju dhe a jeni pro vaksinimit?

Jam vaksinuar dhe kam kaluar Covid jo lehtë. A jam pro vaksinimit? Kur nuk ka diçka më të mirë, padyshim që jam. Megjithëse në rastin tim jam pak dyshues lidhur me vaksinat. Kalova 1,5 vite midis 380 nxënësve dhe 70 punonjësve pa u infektuar. Ne mars – prill u vaksinova me të dy vaksinat, në gusht u infektova.

Post-Covidi i vështirë. Mësuesit e mij nuk janë vaksinuar të gjithë, por 90% e tyre e kanë kaluar Covid-in. Për sa i përket vaksinimit me detyrim, në se ky vaksinim sikur edhe vetëm 1 % do të shërbente për parandalimin apo mbrojtjen e fëmijëve, padyshim që do ta pranoja.

—–

©Copyright Gazeta DITA

Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016