Personalisht mendoj se cdo ditë ka nga një arsye për të protestuar në Shqipëri, aq më tepër për 20 Shkurtin, por jo më me protogonistë shkurtanakët e kësaj klase politike qesharake, injorante dhe të babëzitur deri ne fijen e fundit të barit të këtij vendi. Sepse nismëtarët e 20 Shkurtit të parë u zhdukën nga faqja e dheut dhe idealet e asaj ditë të bekuar u manipuluan nëpër ingranazhet e ndryshkura të retorikës pseudodemokratike përgjatë dy dekadave, në vendin që ishte dhe mbetet edhe sot e kësaj dite më i varfri në kontinent.
Sepse idealet e 20 Shkurtit të parë u shfrytëzuan nga një klasë politike, e vecantë në llojin e vet, turpi i Shqipërisë dhe i gjeneratës politike të tranzicionit në ish vendet komuniste, e paaftë dhe e korruptuar, që merr, përcjell dhe mbron dora dorës pushtet të korruptuar dhe të inkrimunuar deri në palcën e shtetit, mungesën e të cilit e shohim dhe e ndiejmë në cdo pëllëmbë të këtij vendi.
Sepse pronat u hipotekuan nga shërbëtorët e djeshëm të diktaturës dhe nga parafabrikatet e tyre prodhohen paratë e pista, trafiqet dhe industria e rëndë e korrupsionit, modeli më i shëmtuar për t’u ballafaquar sot me 20 shkurtin e parë.
Sepse thirrjet për t’a bërë Shqipërinë si gjithë Europa, u mbytën nga balta që i hodhëm njëri tjetrit në surrat përpara Europës dhe 20 shkurti i sotëm e gjen vendin tonë më afër Kandaharit dhe Libanit se sa Barit dhe Selanikut.
Sepse shteti shqiptar, nuk ka arritur akoma, as një ditë te vetme të kryejë funksionet e veta si shtet i së drejtës, ku shqiptari të jetë i barabartë me shqiptarin dhe endacaku me Presidentin. Sepse 160 Partitë politike, të krjuara mbi bërthama bajraktarizmi, nepotizmi dhe interesash ekonomike, janë në fakt treguesi më i mjerë i shkollës politike në vend, në të cilën aderojnë akoma të rinj dhe të reja, hallexhinj dhe të mashtruar për një vend pune. Sepse Kushtetuta e këtij vendi e ka nxjerrë qytetarin në orbitë, roli i të cilit nuk ndihet më, as në nivel lokal dhe as në nivel qendror. Sepse pasuritë kombëtare të këtij vendi janë magazinuar njëherë e mirë nëpër galeritë e frikshme të krimit të organizuar kombëtar dhe ndërkombëtar.
Përtej 20 Shkurtit të parë, idealeve të tij dhe mundësive për të shfaqur veten si një popull i qytetëruar, kam bindjen se ne, shumica e shqiptarëve kemi mësuar t’a shohim protestën e 20 shkurtit të sotëm si një ëndërr pijanecësh të një klubi vrasësish…
Letër e nënshkruar
Simon Ulndreaj