Si vallë nuk u ngopën?!

Dalgadalë po hapet thesi

Pus i qelbit po shpërthen

Dihet që nuk hiqet vesi

Që ngulitur ësht’ në gen.

 

Po mësojmë se si u ngopën

Si u trashën sa një ka

Si lëkurën ia rropën

Këtij populli fukara.

 

Dhe çudirat s’kanë të sosur

N’qeverisjen gërdeciane

Paçavure, katranosur

Me turi  në shumë sahane.

 

Thonin: “Jemi në dietë

larg u rrimë edhe byrekëve”

Thonjtë ngulën mbi buxhet

Të marrosurit pas lekëve.

 

Kot nuk tha dikur shkodrani

Tek i qante hallet lokës

Nuk kalohet, mor amani

Po s’i ndihe diçka rrogës

 

Që t’mos prishet terezia

Të peshojë mirë kandari

N’bordero si kukafshehtas

Qindra orë jashtë orari.

 

Eh ju lumtë, dhe aferim

Si bareshë e molët shtetin

Kur t’ju marrin në testim

shpresojmë dini alfabetin

 

Me laps bënit llogari

Bukuri doli hesapi

Hapur syçkat plot çudi

Lekët  shkuan te kasapi

 

Kudo ka administratë

T’i shërbejë nga pak miletit

Ju menduat ditë e natë

Vetëm për paratë e xhepit

 

Dhe këta që kapin  zyrën

E n’ karrike  rishtas ulen

Për të mos e nxirë fytyrën

Para ligjit të përkulen.

 

Nëse ligjin e përthyejnë

Përsëritet historia

Në buxhet po qe se ngjyejnë

Mos i mbroftë “nënë partia”