Ja si t’i japësh 215 milionë lekë vetes

Hetimet po e nxjerrin një personazh mediatik vërtet interesant kreun e PAK (personave me aftësi të kufizuar) Sinan Tafaj. Pronësitë e tepruara dhe rroga që kalon 6.3 milionë në muaj pasohen nga një tjetër hije skandali që lidhet me Institutin e Nxënësve që nuk Shikojnë “Ramazan Kabashi”.

Z.Tafaj ka lidhur një kontratë që arrin deri në vlerën e 215 milion lekëve me Institutin e Nxënësve që nuk Shikojnë (një kopje të së cilës e disponon edhe gazeta), në bazë të së cilës shoqata që ai drejton ka marrë fonde për të shtypur librat Brail (sipas standardit për të verbërit) me shtypshkronjën e Shoqatës që drejton vetë prej 22 vitesh tashmë. Mirëpo, Instituti i Nxënësve që nuk Shikojnë financohet nga buxheti i shtetit pikërisht për të shtypur libra për personat që nuk shikojnë dhe për këtë qëllim ky Institut është i pajisur me shtypshkronjën e vet.

Por, pavarësisht se ky Instituti zotëron shtypshkronjën e vet për shtypjen e teksteve, z.Tafaj ka lidhur kontratë që këto libra të shtypen në shtypshkronjën e tij. E gjitha kjo duket se kryhet në bashkëpunim, pasi për shtypshkronjën e Institutit “dikush” kujdeset ta mbajë në gjendje mosfunksionimi. Fondi i fundit i miratuar nga buxhetit i shtetit për këta libra është 215 milionë lekë. Dhe ka shkuar tek… shtypshkronja e shoqatës së z.Tafaj. Bravo!

Personat që nuk dëgjojnë: Ligji i PAK na përfshin dhe ne

Për herë të parë pas 24 vitesh projektligji për qasjen e personave me aftësi të kufizuara do të përfshijë në përfaqësim edhe 309 mijë njerëz që nuk dëgjojnë në Shqipëri. Drejtori i Shoqatës Kombëtare të Personave që nuk dëgjojnë, Florjan Rojba, ka thënë se për herë të parë, këtyre personave të cilëve shteti i siguron vetëm arsim 9-vjeçar dhe asnjë mundësi tjetër për t’u integruar në shoqëri, mund të kenë një interpret, pagesa e të cilit do të përballohet nga buxheti i shtetit: “Për herë të parë përfshihen personat që nuk dëgjojnë në grupin e personave me aftësi të kufizuara. Ofron përfshirjen dhe shërbimin e interpretimit në gjuhën e shenjave. Aksesin në informacion për njerëzit që nuk dëgjojnë duke i barazuar ata me njerëzit që dëgjojnë në mënyrën e komunikimit. Përfitimet financiare do të jenë të barabarta me kategoritë e tjera të personave me aftësi të kufizuara”, ka deklaruar ai.

Të rinjtë e verbër: Ligji i PAK, një hap përpara

Edhe grupet e të verbërve janë shprehur pro ligjit për aksesueshmërinë e personave me aftësi të kufizuara, duke theksuar faktin se ky ligj është më në fund një hap i madh përpara në respektimin e të drejtave të tyre. Emiljano Lule, pjesë e Institutit për Integrimin e të Verbërve, thotë në një prononcim për media se ligji për PAK nuk cenon asnjë të drejtë të fituar deri tani. “Madje, ky ligj është një hap përpara për të drejtat e personave me aftësi të kufizuara dhe është në përputhje me Konventën e OKB-së”.