Nuk shkulen nga karrigia që prej vitit 1991

REDAKSIONALE

Pas vitit 1990 kanë ndodhur paradokse nga më të paimagjinueshmet për një shoqëri normale. E teprojmë me këtë përcaktim? Aspak. Kryetari, mëse 22 vjeçar i PAK (Personave me Aftësi të Kufizuar) merr të ardhura në një muaj disa fish më shumë se Kryeministri, se Presidenti, apo ministrat dhe deputetët. Ai ka prona të tundshme e të patundshme, që nga Shqipëria e deri në Spanjën e largët.

Ky kryetar i përjetshëm i një shoqate që gjoja mbron interesat e një grupimi njerëzish që kanë nevojë për ndihmën e shtetit dhe të shoqërisë, por që realisht e ka humbur me kohë funksionin si e tillë. Tashmë, ai përmendet si disa krerë të përjetshëm sindikatash, i vetmi funksion, mision apo qëllim i tyre ka qenë kultivimi i një mendësie të mbrapshtë antiligjore dhe antidemokratike.

Ka ndodhur kështu pasi ata kanë përfituar maksimalisht nga mungesa e një shteti ligjor dhe nga sundimi i një politike gangsterësh politikë, që nuk kanë asnjë lloj parimi në jetën e tyre. Gjatë gjithë këtyre viteve synimi i vetëm i pacenuar për këta tipa ka mbetur pasurimi. Kujtoni njëfarë Valer Xheka në krye të Bashkimit të Sindikatave të Pavarura njëzet e ca vjet më parë dhe pasardhësin e tij, Gëzim Kalaja. Kujtoni edhe ca kryetarë apo presidentë shoqatash dhe do ndeshni mes tyre edhe Sinan Tafajn.

E pra, njerëz të tillë mbartin me vete një përgjegjësi historike: atë të shkatërrimit të lëvizjes sindikaliste në vend. Kjo është një nga plagët e mëdha që ata me papërgjegjshmërinë e tyre, me aventurizmin dhe me pangopësinë e tyre i kanë shkaktuar shoqërisë shqiptare. Është e njëjta histori që ngjan me të shkuarën politike të disa kryetarëve partish, të cilët po ashtu nuk shkulen nga karrigia që prej vitit 1991.

***

Sinani, “mbreti” i të verbërve

Nga Aida Nako

Të jesh kryetar i një shoqate të caktuar në Shqipëri, duket se ka edhe të mirat e saj. E nuk është e rastit që lufta për të mbajtur për vite një karrige të tillë është e ashpër. Rasti i fundit është ai i Kryetarit të Shoqatës të të Verbërve të Shqipërisë, Sinan Tafaj, i cili po kundërshton ligjin për aksesueshmërinë e personave me aftësi të kufizuar, e me sa duket zelli i tij ndaj këtij ligji e ka burimin tek pasuria personale dhe fakti se miratimi i tij i heq disa kompetenca në përfitimin e fondeve dhe trajtimin e privilegjuar që ka marrë për më shumë se 22 vjet në krye të shoqatës, nga janari 1992.
Pronat
Ndër mesazhet e shumta që kanë ardhur në redaksinë e gazetës pas protestës së djeshme të organizuar nga vetë Tafaj përpara Kryesisë së Kuvendit, shkruajnë se ai zotëron një hapësirë të konsiderueshme toke në periferi të Tiranës, Linzë, në një pjesë të së cilës është duke ndërtuar edhe një vilë 4-katëshe. Sipas kartelës së pasurisë së paluajtshme të regjistruar në zyrën vendore të Regjistrimit të Pasurive të Paluajtshme të komunës Dajt, vërtetohet se Tafaj zotëron dy parcela toke, respektivisht 960 m2 dhe 2052 m2. Në dokumentin e paraqitur për hipotekim, thuhet shprehimisht se “dosja e objektit: ‘Godinë banimi 3kt + papafingo + 1 kt nëntokë’ në fshatin Linzë, Komuna Dajt, me investitor Sinan Tafaj dhe me sipërmarrës Shoqërinë “3D Konstruksion” shpk’. Objekti është ndërtuar në një parcelë me sipërfaqe prej 960 m2 dhe ka sipërfaqe ndërtimi në katin përdhes 144 metra katror”. Por, gjithsesi sipërfaqja për të katër katet e ndërtesës arrin në 576 m2.

Letra
Letra e ardhur pranë redaksisë citojnë edhe faktin se Tafaj ka abuzuar edhe me fondet e shtetit për ndërtimin e një qendre për rehabilitimin e të verbërve. Burimi thotë se ndonëse ka bërë shumë investime, ajo qendër është në mëshirë të fatit dhe nuk ka funksionuar asnjëherë, duke mos ofruar asnjë lloj shërbimi për personat e verbër.

Projektligji që kundërshtohet nga PAK

Së pari, ky ligj është një domosdoshmëri për të krijuar kushtet e nevojshme për respektimin e barabartë të të drejtave të të gjithë grupimeve të personave me aftësi të kufizuara, duke përafruar legjislacionin shqiptar me Konventën e OKB-së për të Drejtat e Personave me Aftësi të Kufizuara.

Projektligji:

1. Ruan të paprekura të gjitha të drejtat e arritura deri më tani për personat me aftësi të kufizuara.

2. Jep një përkufizim bazë dhe unik të personit me aftësi të kufizuara, që do të përdoret në gjithë legjislacionin shqiptar, kur preken çështjet e aftësisë së kufizuar duke eliminuar pabarazitë në trajtimin e personave me aftësi të kufizuar deri më sot.

3. Orienton ndryshime të nevojshme në të gjithë legjislacionin shqiptar, me qëllim përafrimin e legjislacionit të brendshëm me Konventën për të Drejtat e Personave me Aftësi të Kufizuara.

4. Përcakton konfigurimin shumë-disiplinor të komisioneve të vlerësimit të aftësisë së kufizuar, bazuar në Klasifikimin Ndërkombëtar për Funksionimin, Aftësitë e Kufizuara dhe Shëndetin (ICF), si standard të Organizatës Botërore të Shëndetësisë.

5. Ngre Këshillin Kombëtar për të diskutuar hapur mbrojtjen dhe të drejtat e personave me aftësi të kufizuara, ku do të jenë anëtarë edhe 5 persona me aftësi të kufizuara/përfaqësues organizatash, si strukturë e ngjashme në legjislacionet e tjera si ligji “Për mbrojtjen e fëmijëve” dhe ligji “Për barazinë gjinore”. Kriteret e përfaqësimit në këtë Këshill do të përcaktohen me akt nënligjor.

Ligji synon të eliminojë gradualisht diferencat aktuale në trajtimin e grupeve të ndryshme të personave me aftësi të kufizuara, si për shembull personat me aftësi të kufizuara mendore, personat me probleme dëgjimi, etj.

Përfaqësues të shoqatave protestojnë për projektligjin e PAK

Personat me aftësi të kufizuara kanë protestuar para Kryesisë së Kuvendit duke i kërkuar deputetëve të mos miratojnë projektligjin e përfaqësimit të propozuar nga Ministria e Mirëqenies Sociale dhe Rinisë.Sipas tyre, ky ligj është përjashtues për ta dhe u cenon të drejtat e fituara deri më tani. Në seancën parlamentare të Komisionit të Çështjeve Sociale ishin ftuar grupet e interesit të cilët kanë shprehur shqetësimet e tyre lidhur me këtë projektligj. Sinan Tafaj, presidenti i Këshillit të Aftësisë së Kufizuar, theksoi: “Ky projektligj mban në konsideratë interesat e atyre që jetojnë në kurrizin tonë që janë fondacionet që gjoja mbrojnë të drejtat tona. Në Konventën e OKB-së nuk do të gjeni asnjë përcaktim “organizata për personat me aftësi të kufizuar”. Ky projektligj gropos lëvizjen e aftësisë së kufizuar të personave me aftësi të kufizuar.” Deputetët kanë dëgjuar shqetësimet e personave me aftësi të kufizuara dhe në seancën e radhës do ta diskutojnë atë nen për nen. Ndërkohë që në seancë përfaqësuesit e personave me aftësi të kufizuara shprehnin shqetësimet e tyre, jashtë, persona të verbër, paraplegjikë, tetraplegjikë dhe shoqërues të tyre, kanë vijuar protestën.

Veliaj: Protestat i respektoj, por skema e abuzimit duhet pastruar

Ministri i Mirëqenies Sociale dhe Rinisë, Erion Veliaj, ka reaguar ndaj protestës së personave me aftësi të kufizuar. Ai thotë se respekton çdo protestë, por nuk do ketë tërheqje pas për ligjin e personave me aftësi të kufizuar. Sipas Veliajt, ka pasur abuzime të rënda me përfituesit e pagesës së invaliditetit. Për këtë arsye, ai thotë se ky ligj do të miratohet kështu siç është. “Respekt për çdo protestë, por skema do pastrohet, FMN ka të drejtë, ndaj po kalojmë ligjin për personat me aftësi të kufizuar që të heqim abuzuesit, jo të drejtat”, shprehet ai. Protestuesit e kanë akuzuar Veliajn se nuk ka qenë i ndershëm me ta. Madje, sipas tyre, Veliaj ka tentuar t’i përçajë.

Faksimile të zyrës vendore të Regjistrimit të Pasurive të Paluajtshme të komunës Dajt