Sistemi është shpikur veç për të mëdhenjtë

Arben Duka

Partitë politike,
nuk kanë shumë asete,
ndaj dhe emrat shihen,
si kuriozitete!

Në lista partish,
e kotë që kërkon,
nuk gjen dot një emër,
që të befason!

Sërish dot s’i hyjmë,
në zemër problemit,
se të gjithë garuesit,
janë brenda sistemit

Kush është jashtë sistemit,
s’ka shpresë faktikisht,
dhe shumë nxitojnë,
t’u vënë nga një bisht!

Kemi Bojaxhiun,
që kërkon Tiranën,
ka shumë që thonë,
se punon për Ramën!

Sikur ky që thamë,
të jetë i pikuar,
është pa nisur gara,
i paragjykuar!

Këto thashetheme,
duken si të kota,
por bëhen që djathtas,
të mos marri vota!

Dhe s’ka ku kërkon,
të tjera pastaj,
sepse votat majtas,
s’i ka hiç kollaj!

Të majtët s’do bëjnë,
llogari “të rënda”,
por do votojnë majtas,
për të qenë brenda!

Por edhe të djathtët,
njëlloj do mendojnë,
nga frikë e së majtës,
djathtas do votojnë!

Po njëlloj do mbyllet,
dhe kjo histori,
se tek ne mungon,
fare zona gri

Nuk ka që vendosin,
minutën e fundit,
kush shpresoj te “grija”
ja fut kot katundit!

Njerëzit në dy kampe,
janë të rreshtuar,
se tifozeria,
nuk është tejkaluar!

Njerëzit jashtë sistemit,
mendohen si miza,
dhe s’pritet të ketë,
asgjëkund surpriza

S’fiton jashtë sistemit,
sot kurrën e kurrës,
veç ndonjë çudi,
mund të ndodhë në Durrës!

Duka mund ta marri,
dhe pse është vështirë,
ndaj Luli për Durrësin,
po mendohet mirë!

Sistemi është shpikur,
kështu të punojë,
që jashtë “të mëdhenjve”,
të mos funksionojë!

Kundër të mëdhenjve,
ende s’ka një gjetje,
ngaqë gjithë sistemin,
e kanë në mbështetje!