Flamuri shqiptar “prodhim kinez”, tashmë përdoret zyrtarisht

Deformimi i flamurit kombëtar shqiptar ka marrë përmasa shqetësuese.

Të prodhuar diku në ndonjë cep të Azisë, këta flamuj kanë  ardhur  fillimisht në Shqipëri e Kosovë, që të përdorën për raste të ndryshme, kryesisht gjatë festave për të zbukuruar rrugë e sheshe.

Por flamuri kombëtar  me shqiponjën e deformuar tek gjuha dhe sqepi i saj, kanë filluar të zënë vend edhe në pritjet zyrtare shtetërore.

Madje një flamur i tillë i çoroditur, ndoshta pa fajin e tyre,  shihet edhe në pritjen zyrtare që kryeministri iSerbisë, Aleksandër Vuçiq, i bëri sopranos së madhe shqiptare, Inva Mula, – raporton lajmi.net.

Kokat e shqiponjës në këtë flamur, ishin të deformuara ashtu  siç shpesh ndodh edhe në flamujt që shiten tek tregtarët ambulantë në Shqipëri e Kosovë.

Kryeministri Rama ishte pritur në Beograd nga homologu i tij serb me flamur të rregullt

Siç edhe mund të shihet në njërën nga fotografitë e shumta të vizitës së Ramës në kryeqytetin serb në nëntor të vitit 2014, flamuri kombëtar shqiptar ishte i duhur dhe pa gabime në dizajnin e tij.

Pavarësisht kësaj, duket se vetë zyrtarët shtetërorë të Shqipërisë janë aq neglizhent në këtë pikë, sa edhe vetë e përdorin flamurin kombëtar të çoroditur herë te koka e herë te bishti.

Flamuri i katandisur në krah të ish kryeministrit Berisha në një nga mbledhjet zyrtare 

Ish kryeministri Sali Berisha kishte mbajtur takime zyrtare me flamurin e katandisur si mos më keq, – raporton Lajmi.

Gjithashtu,  konferencë shtypi kishte mbajtur edhe ish ministrja Majlinda Bregu me flamurin kombëtar prapa krahëve, që dukej me ‘nofull’ të zgjatur thuajse ishte pikturuar nga ndonjë fëmijë.