Skema ende e “fryrë”, 260 mijë përfitues duan pagesat

Mbi 260 mijë është numri i familjeve dhe individëve që mbahen me pagesat sociale të shtetit. Autoritetet e Ministrisë së Mirëqenies Sociale dhe Rinisë, vënë në dukje edhe pse skema e ndihmës ekonomike është fryrë abuzivisht për vite me radhë, sërish numri i përfituesve të kësaj pagese paraqitet i lartë. Konkretisht sipas të dhënave të konfirmuara nga zëvendësministrja Bardhylka Kospiri, rezulton se në listën e kategorive në nevojë, numri i familjeve që përfitojnë ndihmë ekonomike është rreth 100 mijë, ndërkohë që numri i personave me  aftësi të kufizuar shkon në rreth 160 mijë.

Për t’i dhënë fund praktikave abuzive të ndarjes së pagesave tek personat që nuk përmbushin kushtet, Kospiri deklaron se e gjithë skema është në proces të plotë reformimi, ku me  ndihmën e Bankës Botërore do të aplikohet edhe kontrolli i ndarjes së pagesave nëpërmjet digjitalizimit të plotë të skemës, punë e cila ka  nisur tashmë. “Jemi në proces reformash, çka do të thotë se sistemi i mbrojtjes sociale që i përfshin të dyja pagesat, ndihmën ekonomike  dhe aftësinë e kufizuar, po modernizohet. Kjo reformë ka për qëllim të shmangë abuzimet, në mënyrë që ndihma ekonomike të shkojë realisht në familjet në nevojë”, thekson Kospiri.

Modernizim i ndihmës ekonomike do të thotë se të gjithë ata persona që pretendojnë të përfitojnë ndihmë sociale do të regjistrohen  elektronikisht në skemë. Përzgjedhja e tyre do të bëhet në bazë të informacionit të regjistruar dhe që disponohet edhe në rrjetet e tjera të regjistrimit. Kështu, familjet që do të përfitojnë ndihmë ekonomike do të jenë ato familje që vërtet janë në nevojë.