Skënder Gjinushi: PSD hap dyert për të zhgënjyerit

Kryetari i PSD-së, Skënder Gjinushi analizon në këtë intervistë ekskluzive për DITA-n aktualitetin politik para zgjedhjeve të 21 qershorit.

Pse ka pakënaqësi në radhët e të majtëve dhe si e ka pritur ai marrëveshjen e PS-së me PDIU-në.

Çfarë mendon Gjinushi për fushatën për dekriminalizimin e politikës, për çështjen ‘Doshi’ dhe sa do të ndikojë ajo në zgjedhjet e ardhshme vendore.

Nga ana tjetër dhe një vështrim mbi situatën në kampin opozitar dhe pse thotë ai se dy mami nxjerrin fëmijë çyrykë…

– Zoti Gjinushi, a është normale që, kur edhe pak ditë na ndajnë nga afati për regjistrimin e kandidatëve, partitë ende nuk kanë qartësuar përfundimisht aleancat për zgjedhjet e 21 qershorit?

Sigurisht që s’është normale por kjo vjen nga që po bëhet traditë në politikën shqiptare, që me të tjera aleanca bëhet opozitë e fitohen zgjedhjet e me të tjerë ndahet pushteti, ashtu si po kthehet në praktikë që të harrosh kontributet e aleatët realë gjatë qeverisjes e të kërkosh bashkëpunimin me ta vetëm në prag fushate, siç i thotë populli ‘sa për të kaluar lumin e radhës’.

– Ju e kini kritikuar PS-në për mosmbajtje të premtimeve ndaj aleatëve. Besoni se një aleancë e re do ta zgjidhte këtë ngërç në gjirin e mazhorancës?

Ne kemi qenë vazhdimisht për aleanca afatgjata midis partive që i bashkon programi, vizioni, parimet e një përvojë e gjatë bashkëpunimi sidomos në opozitë ku dhe bashkëpunimi është më i sinqertë. Dihet se aleancat e koalicionet s’janë të pandryshueshme, por kudo ato kanë një bërthamë thelbësore të pandryshueshme, bazohen mbi ndarjen e majtë, e djathtë, nuk ndryshojnë sa herë ka zgjedhje, përveç se me faktorë a partnerë tercialë. Duhet kuptuar se klasifikimi i majtë – i djathtë nuk bëhet me vetëdeklarim, por me program e sidomos qëndrime, dhe lëvizjet majtas-djathtas nuk mirëkuptohen, as këshillohen. Tek ne janë prishur këto parime e rregulla bazë, çka e ka hutuar zgjedhësin, pa harruar faktin se e djathta tek ne, për populizëm flet më shumë në emër të shtresave të majta.

– Si e pritët afrimin e PDIU-së dhe arritjen e marrëveshjes me PS-në?

– Kjo lëvizje vërteton çka thamë më lart, se pragmatizmi a prakticiteti ka triumfuar mbi parimet e respektin ndaj votuesve. Kujtojmë se që nga viti 2005 shumica e radhës qeveris me parti kundërshtare në zgjedhje. Kështu, votuesit votojnë Agraret për të fituar e majta më 2005, e shohin si vota e tyre përdoret nga e djathta, votojnë më 2009 LSI për të hequr Berishën e shohin si qeveria Berisha i heq e vjedh me votat e tyre, fatkeqësisht këtë fat paskan pasur edhe votuesit e PDIU.

– Prej më shumë se një muaji opinioni është tronditur nga i ashtuquajturi ‘Skandali Doshi”. Mendoni se çështja Doshi do të ndikojë në numrin e votave të kësaj maxhorance në zgjedhjet e 21 qershorit?

Çështja Doshi do të ndikojë jo thjesht për përmbajtjen, pasi çështje të tilla në Kuvend dëgjon çdo javë, për më tepër opinioni është mësuar me to e s’bëjnë të njëjtin efekt. Por kjo do të ndikojë për dy arsye të thjeshta sipas nesh. Të majtët shohin me keqardhje se si pala jonë është gjithnjë në mbrojtje e Saliu në sulm. Pra, as dy vjet pas fitores, dekriminalizimi i politikës, dmth ndëshkueshmëria e politikanëve që zhyten në korrupsion e krim shoqërinë shqiptare është zëvendësuar me dekriminalizimin e Kuvendit nga disa të përdorur nga politika. Në vend të dënimit të të padënuarve në politikë që kanë prekur xhepat e mirëqenien e shqiptarëve, kërkohet të ridënohen me ligj ca të dënuar në vendet e BE-së. Së dyti, të majtët shohin se si shpërblehen kontribuesit kryesorë të fitores së 23 qershorit ashtu siç janë shpërblyer edhe mijëra prej tyre që iu duhet in extremis t’i gjejnë ndonjë mik drejtorëve të PD të konvertuar për të siguruar ndonjë punësim mbijetese.

– Ju kini dhënë shenja se ish-deputeti i LSI-së, Dritan Prifti mund të bëhet pjesë e PSD-së. Po kështu edhe për Doshin. Besoni se kjo do t’i japë një shtysë, një energji të re PSD-së, dhe si është pritur ky afrim, nëse keni informacione, nga Partia Socialiste?

Vlerësojmë e shohim përditë se ka shumë të majtë, nga përkrahës të thjeshtë deri ish-deputetë e persona politikë me aktivitet të njohur publik që shprehin dëshirën e gatishmërinë për të mbështetur PSD-në si partinë më përfaqësuese të së majtës shqiptare. Çdo kontribut i tillë është i mirëpritur nga ne.

– Po në kampin opozitar si e shikoni gjendjen? Duket e afërt mundësia që PD të dalë praktikisht vetëm këto zgjedhje lokale.

Opozita është në krizë pasi është një opozitë me dy koka dhe, siç i thonë, dy mami nxjerrin fëmijë çyrykë. Merret me mend ç’ndodh kur një nga mamitë ka punuar kasap. Problemi është se, ndryshe nga PS, që ka qenë gjithnjë dorështrënguar ndaj aleatëve, PD, duke e ditur se e vetme as nuk mund t’i afrohet fitores, ka qenë më dorëlëshuar me aleatët, pra i ka mësuar keq. Kjo tolerancë patjetër që sjell pakënaqësi brenda partisë, por sa ishte Berisha në krye, s’guxonte kush ta shprehte pakënaqësinë, ndërsa Luli s’e përballon dot. Për pasojë, kryetari ri nuk e zgjidh dot balancimin midis orekseve të të vetëve e të aleatëve, aq më shumë që këtu futet dhe një i tretë, i cili orekset e tija i plotëson me diktat.

– Nga një seri hapash dhe lëvizjesh të kohëve të fundit, ngjan se ish kryetari Berisha po e kontraston në çdo moment Lulzim Bashën; a mund të thuhet se Berisha po punon për një humbje të rëndë të Bashës në këto zgjedhje?

Duket që Berisha e ka kuptuar se Kryetari i emëruar nuk e mbledh dot partinë e aq më shumë opozitën, pra nuk është afatgjatë. Si i tillë ai nuk i garanton trashëgiminë, pra misionin për të cilin u vu. Në këto kushte, nuk përjashtohet mundësia që Berisha mendon tashmë për zëvendësimin e Bashës. Lokalet janë një rast i mirë. Me zgjedhjet lokale ka djegur edhe disa prej figurave që rrezikonin t’i bënin hije mos atij, zëvendësuesit të tij./Xh.SH/DITA