Kampionët fitojnë në Gjirokastër, kurbinasit bëjnë rokadë me Teutën. Suksesi i parë për Apoloninë
Skënderbeu nuk njeh rivalë dhe marshon pa pengesa drejt titullit kampion, ndërkohë që tashmë është kampion i dimrit, matematikisht i pakapshëm për këtë fazë nga ndjekësit më të afërt, që janë Kukësi e Laçi. Dje korçarët kanë fituar 1-0 në Gjirokastër, me golin e Sebino Plakut. Luftëtari kërkoi t’i vihej Skënderbeut pa u druajtur nga emri i kampionëve, por gjithçka ishte e kotë, sepse ligjin në fushë e bëri skuadra e Mirel Josës. Shkëmbi, Plaku e Pejiç ishin përherë një nivel më lart vendasve, të cilët provuan me të gjitha mënyrat, por përpjekjet e tyre u ndalën pa shumë probleme nga miqtë. Bici e Gvozdenoviç janë të pakalueshëm, ndërkohë që sulmi shfaqet efikas. Përmes kundërsulmit të shpejtë e me pak pasime erdhi edhe goli i vetëm i ndeshjes.
Një krosim nga e djathta e sulmit shkon në zonën gjirokastrite, ku Liçaj ka tërë mundësitë për ta larguar me kokë, para se të ndërhynte Plaku e të shënonte. Kjo ndodh në minutën e 30-të, duke konfirmuar pjekurinë, qetësinë dhe qartësinë e dukshme taktike të skuadrës së Josës. Vlonjati Liçaj është fajtor në momentin e pësimit të golit nga Plaku, ndaj Martini e zëvendëson me Llukën, ndërsa në fillim të pjesës së dytë ka vend edhe për aktivizimin e Zholit, në vend të Rraboshtës. Vlen të përmendet minuta e 24-t e kësaj ndeshjeje, kur gjirokastritët kanë pretenduar për penallti, teksa topi i krosuar nga këndi kalon nëpër dorën e Pejiçit, i kthyer në mbrojtje, por gjyqtari Jorgji vazhdon lojën. Përpjekjet e vendasve vazhduan edhe në pjesën e dytë, teksa i janë afruar portës së Shehit seriozisht, sidomos me goditjet standard, por pa e prekur dot rrjetën e tij. Skënderbeu qarkullon dendur topin dhe arrin ta ulë ritmin e kundërshtarit, shpeshherë edhe t’i nervozojë ata, duke administruar në mënyrë të zgjuar epërsinë e minutës së 30-të. Pa ndonjë shkëlqim të madh, por me shumë pragmatizëm, korçarët marrin tri pikët, ndërsa Luftëtari renditet në zonë e ftohtë.
Laçi kap Kukësin
Ndjekësit më të afërt të Skënderbeut janë një dyshe e pazakontë, Kukësi e Laçi, në kuotë të barabartë pikësh, nga 21. Laçjanët kanë mundur dje Teutën në një përballje rivalësh për zonën evropiane. Ata e kanë nisur në sulm lojën dhe kanë mbajtur nën kontroll thuajse tërë kohën, ndërkohë që miqtë i patën mundësitë e tyre për të shënuar. Që në minutën e nëntë Laçi shënoi me anë të Nimanit, i cili ndërhyri me shpejtësi pas gjuajtjes me kokë të Ndrekës. Pak minuta më pas, Laçi fiton një penallti, të cilën e gjuan Vucaj, por grushton Rizvani. Pjesa e dytë ka qenë edhe më e bukur, me sulme dhe kundërsulme të dy skuadrave. Teuta është më e orientuar drejt portës së Vashakut, në kërkim të barazimit. Por, goli i Nimanit mbetet i vetmi deri në fund dhe kurbinasit janë në vendin e tretë, duke bërë rokadë me Teutën.
Fiton Apolonia
U desh të vinte java e 12-të e kampionatit që Apolonia të arrinte fitoren e parë. Falë suksesit 2-1 kundër Besës, fierakët kanë kapërcyer Tomorin dhe janë afruar me Shkumbinin. Pjesa e parë e takimit u mbyll me epërsinë e kavajasve, falë golit të shënuar nga Sefa. Ndoni barazoi me penallti në minutën e 76-të, duke ngjallur shpresat për tri pikë. Synimi u arrit pesë minuta më vonë, kur Ribaj shënoi golin e dytë, të cilin vendasit e mbrojtën fort deri në fund.
Java e 12-të
Të shtunën
Kukësi-Kastrioti 3-1
Progni 25′, Popoviç 70′, Allmuça 89′ / Daja 3′
Bylis-Tirana 1-0
Bakiu 68′
Tomori-Shkumbini 0-0
Vllaznia-Flamurtari 3-3
Rexha 63′, 95′, Deliç 78′ / Osmani 27′ (a), Muzaka 31′, Pepa 53′
Dje
Luftëtari-Skënderbeu 0-1
Plaku 30′
Apolonia-Besa 2-1
Ndoni 76′, Ribaj 81′ / Sefa 25′
Laçi-Teuta 1-0
Nimani 9′
Renditja
1 Skënderbeu 30
2 Kukësi 21
3 Laçi 21
4 Teuta 20
5 Tirana 19
6 Bylis 18
7 Vllaznia 17
8 Besa 16
9 Flamurtari 16
10 Kastrioti 12
11 Luftëtari 11
12 Shkumbini 9
13 Apolonia 8
14 Tomori 6